Paruchuri: హీరోయిన్ రంజిత అలా ఎందుకు చేసిందో ఇప్పటికీ అర్థం కాలేదు: పరుచూరి గోపాలకృష్ణ

తెలుగు .. తమిళ భాషల్లో కథానాయికగా రంజిత మంచి పేరు తెచ్చుకుంది. స్టార్ హీరోలతో నటిస్తూ మంచి క్రేజ్ తెచ్చుకుంది. అలాంటి రంజితను గురించి తాజాగా 'పరుచూరి పలుకులు'లో పరుచూరి గోపాలకృష్ణ మాట్లాడారు. "రంజితను చూడగానే ఆ అమ్మాయికి హీరోయిన్ అయ్యే లక్షణాలు వున్నాయనిపించింది. వాళ్ల నాన్నగారిని ఒప్పించడం వలన, తెలుగు తెరకి 'కడప రెడ్డెమ్మ' సినిమా ద్వారా పరిచయమైంది.

ఆ తరువాత తమిళ ఇండస్ట్రీకి వెళ్లి కథానాయికగా అగ్రస్థానాన్ని అందుకుంది. ఆ తరువాత దర్శకురాలిగా మారాలని ఉందంటే వారించాను. అప్పుడు వెళ్లిపోయిన ఆ అమ్మాయి చాలాకాలం క్రితం నా దగ్గరికి వచ్చినప్పుడు 'నిత్యానంద'ను గురించి ప్రస్తావించింది. నిత్యానంద రాసిన ఒక బుక్ నాకు ఇస్తూ ఆయన మీటింగ్ కి రమ్మని అడిగింది. అలాంటివాళ్లు నాకు ఎక్కరని అన్నాను. 'నువ్వు కూడా వెళ్లకు' అని చెప్పుంటే బాగుండేదేమో. ఏ భ్రమలో పడి అటువైపు వెళ్లిందోగానీ, ఆ తరువాత ఆమె జీవితంలో అనేక మలుపులు. వాళ్ల నాన్న కోరుకున్న కుటుంబ జీవితాన్ని .. నేను ఆశించిన సినిమా జీవితాన్ని కాదని ఆమె అలా ఎందుకు వెళ్లిపోయిందనేది ఇప్పటికీ నాకు అర్థం కాలేదు" అని ఆవేదనను వ్యక్తం చేశారు.