'దర్బార్' నుంచి ఆ సీన్లు కట్ చేసిన నిర్మాతలు!

సౌతిండియా సూపర్ స్టార్ రజనీకాంత్ నటించిన తాజా చిత్రం 'దర్బార్'లో వివాదాస్పదమైన సీన్లను కట్ చేశామని నిర్మాతలు ప్రకటించారు. సినిమాలోని జైలు సీన్లలో " డబ్బు ఉంటే జైలు నుంచి బయటకు వెళ్లి షాపింగ్‌ చేసి రావచ్చు" అన్న డైలాగ్ దుమారాన్ని రేపిన సంగతి తెలిసిందే. కేవలం వినోదం కోసమే డైలాగ్ పెట్టామని, ఎవరినీ ఉద్దేశించినది కాదని నిర్మాతలు వివరణ ఇచ్చినా, ఈ డైలాగ్ తమ నేత శశికళను ఉద్దేశించినదేనని అన్నాడీఎంకేలోని ఓ వర్గం నిరసనలకు దిగిన సంగతి తెలిసిందే. దీంతో ఆ సంభాషణలను తొలగించామని నిర్మాతలు స్పష్టం చేశారు.

ఇక సినిమాలోని రజనీ డ్రస్సింగ్ స్టయిల్, తాను రౌడీనని చెప్పే మాటలపైనా కేసులు నమోదయ్యాయి. నాలుగు రోజుల్లో ఓ పోలీసు ఫిట్ నెస్ ను నిరూపించుకోవడంపై పోలీసు ఉన్నతాధికారులు కొందరు ఫిర్యాదు చేశారు. ఓ పోలీసు కమిషనర్ హిప్పీ జుత్తు, గడ్డంతో నటించడం ఏంటని, ఇది పోలీసులను అవమానించేవని మాజీ రక్షణ దళ అధికారి మరియ మైఖేల్ తూత్తుక్కుడి థర్డ్ మెట్రోపాలిటన్ మెజిస్ట్రేట్ కోర్టులో పిటిషన్ వేశారు. ఇది 21న విచారణకు రానుంది.