Kodandarami Reddy: నా పని అయిపోయిందనుకున్న సమయంలో 'అభిలాష' ఆదుకుంది: దర్శకుడు కోదండరామిరెడ్డి

తాజాగా 'ఆలీతో సరదాగా' కార్యక్రమంలో దర్శకుడు కోదండరామిరెడ్డి మాట్లాడుతూ, 'అభిలాష' సినిమాను గురించి ప్రస్తావించారు. "నా కెరియర్ తొలినాళ్లలో చేసిన మూడు నాలుగు సినిమాలు హిట్ అయ్యాయి. ఆ తరువాత రెండు మూడు ఫ్లాపులు పడ్డాయి. దాంతో అంతకుముందు నాతో సినిమా చేయాలనుకున్న నిర్మాతలు వెనక్కి వెళ్లిపోయారు. వాళ్ల మనుషులను పంపించి అడ్వాన్సులు కూడా తిరిగి తీసుకున్నారు. వేరే దర్శకులతో తమ ప్రాజెక్టులను ప్రకటించారు.

దాంతో ఇక నా పని అయిపోయిందని చాలా బాధపడ్డాను. అలాంటి పరిస్థితుల్లోనే కేఎస్ రామారావుగారు 'అభిలాష' చేసే ఛాన్స్ ఇచ్చారు. ఫస్టు కాపీ చూసినవాళ్లు బాగోలేదని అన్నారు. అప్పుడు నేను .. యండమూరి ఇద్దరం కూడా బాధపడ్డాం. కానీ సినిమా విడుదలైన తరువాత పెద్ద హిట్ అయింది. ఈ సినిమా మంచి పేరు తీసుకొచ్చి మళ్లీ నన్ను నిలబెట్టింది" అని చెప్పుకొచ్చారు.