RTC Strike: విధుల్లో చేరిన వారిపై దాడి చేసిన ఆర్టీసీ కార్మికులు.. డ్రైవర్ ను చితకబాదిన వైనం!

విధుల్లో చేరాలనుకున్న ఆర్టీసీ కార్మికులకు తెలంగాణ ప్రభుత్వం విధించిన డెడ్ లైన్ నిన్న అర్ధరాత్రితో ముగిసింది. ప్రభుత్వం విధించిన గడువులోపల కొందరు ఆర్టీసీ కార్మికులు విధుల్లో చేరారు. ఈ నేపథ్యంలో, మహబూబ్ నగర్ లో ఉద్రిక్త ఘటన చోటు చేసుకుంది. విధుల్లో చేరిన డ్రైవర్ తాజుద్దీన్ ను కార్మికులు చితకబాదారు. మహిళా కండక్టర్ కోమల, వాజిద్ లపై దాడి చేశారు. డిపోలోకి దూసుకెళ్లిన కార్మికులు ఈ దాడికి పాల్పడ్డారు.

ఇదే సమయంలో బస్సులు బయటకు రాకుండా అడ్డుకునే ప్రయత్నం చేశారు. అయితే అప్పటికే భారీ సంఖ్యలో అక్కడకు చేరుకున్న పోలీసులు కార్మికులను అడ్డుకున్నారు. డిపో నుంచి బయటకు పంపించారు. ఈ సందర్భంగా పోలీసులు, కార్మికులకు మధ్య తోపులాట జరిగింది. అయితే, ఈ ఘటనకు సంబంధించి పోలీసులు ఎవరిపైనా కేసు నమోదు చేయలేదు. అనంతరం కార్మికులు రోడ్డుపైకి వచ్చి నిరసన చేపట్టారు.