New Delhi: పోలీసులకు పట్టుబడిన ఢిల్లీ 'జేమ్స్ బాండ్'!

ఢిల్లీలో 'జేమ్స్ బాండ్ 007'గా పేరుగాంచిన కృష్ణ అనే నేరస్తుడిని పోలీసులు అదుపులోకి తీసుకున్నారు. ఢిల్లీ షాలిమార్ బాగ్ కు చెందిన కృష్ణ వయసు 27 సంవత్సరాలు. అతనిపై మర్డర్, హత్యాయత్నం, అక్రమంగా ఆయుధాలు కలిగివుండడం వంటి కేసులు 6 ఉన్నాయి. కృష్ణ ప్రత్యేకత ఏంటంటే, నేరాలకు పాల్పడే సమయంలో 007 నెంబర్ ముద్రించి ఉన్న టీషర్టునే ధరిస్తాడు. 007 అనేది కృష్ణ లక్కీ నంబర్. అందుకే ఢిల్లీలో ఈ నేరస్తుడు 'జేమ్స్ బాండ్ 007' గా చాలా ఫేమస్ అయ్యాడు. నెలక్రితమే కృష్ణ జైలు నుంచి విడుదలయ్యాడు. జైల్లో పరిచయమైన వినోద్ తో జతగా దొంగతనాలకు తెరదీశాడు. ఓ చోరీ చేస్తుండగా ఇద్దరినీ పోలీసులు అరెస్ట్ చేశారు. ఆ సమయంలో కూడా కృష్ణ 007 టీషర్టుతోనే ఉన్నాడు.