కర్ణాటకలో రోడ్డు ప్రమాదం.. చిన్నారి సహా 12 మంది అక్కడికక్కడే మృతి
- మురుగుమల్ల వెళ్లే దారిలో ప్రమాదం
- ప్రమాదం జరిగిన వెంటనే పరారైన బస్సు డ్రైవర్
- నుజ్జు నుజ్జయిన టాటా ఏస్ వాహనం
టాటా ఏస్‌ను ప్రైవేటు బస్సు ఢీకొట్టడంతో 12 మంది అక్కడికక్కడే మృతి చెందిన ఘటన కర్ణాటక రాష్ట్రంలోని చిక్‌బళ్లాపూర్ జిల్లాలో జరిగింది. చింతామణి నుంచి మురుగుమల్ల వెళ్లే దారిలో ఈ ప్రమాదం జరిగింది. ప్రమాదం జరిగిన వెంటనే బస్సు డ్రైవర్ అక్కడి నుంచి పారిపోయాడు. టాటా ఏస్‌ను అతి వేగంగా బస్సు ఢీకొట్టడంతో చిన్నారి సహా 12 మంది మృతి చెందగా, పలువురికి గాయాలయ్యాయి. ఈ ఘటనలో కొందరు ఎగిరి రోడ్డుపై పడగా, మరికొందరు బస్సులోనే ఇరుక్కుపోయారు. టాటా ఏస్ వాహనం నుజ్జునుజ్జయింది. గాయపడిన వారిలో సైతం పలువురి పరిస్థితి విషమంగా ఉంది. క్షతగాత్రులను చికిత్స నిమిత్తం ఆసుపత్రికి తరలించారు. పోలీసులు కేసు నమోదు చేసుకుని దర్యాప్తు చేపట్టారు.
