sampoornesh babu: 'నిన్ను హీరోగా పెట్టి సినిమా తీసేదెవరు'? అని నన్ను మా ఆవిడే అడిగింది: సంపూర్ణేశ్ బాబు

తాజాగా 'ఆలీతో సరదాగా' కార్యక్రమంలో పాల్గొన్న సంపూర్ణేశ్ బాబు .. తనకి సంబంధించిన ఒక ఆసక్తికరమైన విషయం గురించి చెప్పుకొచ్చాడు. "మా ఊళ్లో నేను ఒక షాపు పెట్టుకుని గోల్డ్ స్మిత్ గా చేస్తుండేవాడిని .. ఇల్లు సొంతమే .. షాపు అద్దె మాత్రం నెలకి రెండు వేలు. అప్పటికే నాకు పెళ్లై ఒక పాప కూడా వుంది. నెలకి ఓ పది .. పదిహేను వేలు ఆదాయం వచ్చేది. సీజన్ కాకపోతే అంతకూడా వచ్చేవి కాదు.

షాపుకి వెళ్లడం .. పని చూసుకుని ఇంటికి రావడం ఇది నా దినచర్య. అప్పుడప్పుడు మాత్రం జేబులో ఓ అయిదు వందలు పెట్టుకుని హైదరాబాద్ వచ్చేవాడిని. సినిమా ఆఫీసుల చుట్టూ తిరిగి .. తెచ్చుకున్న డబ్బులు అయిపోతున్నాయనగా మా ఊరుకి వెళ్లిపోయేవాడిని. అలా మొత్తానికి ఒక సినిమా లైన్లోకి వచ్చింది. అప్పుడు మా ఆవిడకి చెప్పాను .. 'ఒకతను నన్ను హీరోగా పెట్టి సినిమా తీస్తానని అన్నాడు' అని. మా ఆవిడ ఆశ్చర్యపోతూ .. 'నిన్ను హీరోగా పెట్టి సినిమా తీసేదెవరు'? అని అడిగింది" అంటూ నవ్వేశాడు.