Donald Trump: 'లక్ష్మీస్ ఎన్టీఆర్' గురించి డొనాల్డ్ ట్రంప్... మార్ఫింగ్ వీడియో పోస్ట్ చేసిన రామ్ గోపాల్ వర్మ!

తన సినిమా ప్రమోషన్ విషయంలో ఎల్లప్పుడూ  వినూత్నంగా ఆలోచిస్తుండే దర్శకుడు రామ్ గోపాల్ వర్మ, ఈ నెల 29న విడుదలకు సిద్ధమవుతున్న 'లక్ష్మీస్ ఎన్టీఆర్' విషయంలోనూ అదే పంథాలో నడుస్తున్నారు. ఈ సినిమాను ఎన్నికలు ముగిసేంత వరకూ అడ్డుకోవాలని తెలుగుదేశం నేతలు భావిస్తుండగా, సినిమా అదే రోజు కచ్చితంగా విడుదలవుతుందని చెబుతున్న వర్మ, తాజాగా, అమెరికా అధ్యక్షుడు డొనాల్డ్ ట్రంప్, సినిమాపై స్పందించారంటూ, ఓ మార్ఫింగ్ వీడియోను తన ట్విట్టర్ ఖాతాలో ఉంచారు.

"ఆర్జీవీ తీసిన లక్ష్మీస్ ఎన్టీఆర్ పై మీ అభిప్రాయమేంటి?" అని ఓ రిపోర్టర్ ప్రశ్నించగా, ఇది చర్చించాల్సిన అంశమేనని, ప్రతి ఒక్కరూ దీని గురించి చాలామంది మాట్లాడుతున్నారని, అసలు అక్కడ ఏం జరుగుతుందో చూడాలని అంటున్నట్టు వినిపిస్తుంది. తన అభిప్రాయం తనకుందని కూడా ట్రంప్ చెబుతున్నట్టు ఉంది. ట్రంప్ గతంలో ఓ సందర్భంలో చేసిన వ్యాఖ్యలకు, ప్రశ్నలు జోడించి, ఈ వీడియోను ఎడిటింగ్ చేసినట్టు తెలుస్తోంది. ఫన్నీగా ఉన్న ఈ వీడియోను మీరూ చూడండి.