Reliance: ​ కూతురు, అల్లుడుతో కలసి అంబానీ పెళ్లివేడుకలో రజనీకాంత్ సందడి

రిలయన్స్ అధినేత ముఖేష్ అంబానీ తనయుడు ఆకాశ్ అంబానీ, శ్లోకా మెహతాల వివాహానికి దక్షిణాది సూపర్ స్టార్ రజనీకాంత్ కూడా విచ్చేశారు. శనివారం సాయంత్రం ఆయన తన కుమార్తె సౌందర్య, అల్లుడు విషాగన్ వనంగముడిలతో కలిసి ఈ పెళ్లికి వచ్చారు. ముంబయిలో జరిగిన ఈ సెలబ్రిటీ మ్యారేజ్ కి పూర్తిగా సంప్రదాయబద్ధమైన దుస్తుల్లో వచ్చిన తలైవా ఎంతో ఓపిగ్గా ఫొటోలకు పోజులిచ్చారు. తనను మధ్యలో నిలబడమని అల్లుడు విషాగన్ సూచించినా, అల్లుడు, కూతురు పక్కపక్కనే ఉండాలని ఆయన చూపించిన తపన ఈ సందర్భంగా కొట్టొచ్చినట్టు కనిపించింది. సౌందర్య, విషాగన్ లకు ఇటీవలే పెళ్లయిన సంగతి తెలిసిందే. ఇద్దరూ కొన్నిరోజుల క్రితమే హనీమూన్ పూర్తిచేసుకుని వచ్చారు.