balakrishna: వచ్చేనెల 22న 'మహానాయకుడు' విడుదల?

ఎన్టీఆర్ బయోపిక్ మొదటి భాగంగా వచ్చిన 'కథానాయకుడు' ఆశించిన స్థాయిలో ఆదరణ పొందలేకపోయింది. ఎన్టీఆర్ రాజకీయ రంగప్రవేశం .. ఆ తరువాత చోటుచేసుకున్న పరిణామాలతో 'మహానాయకుడు' రూపొందుతోంది. చిత్రీకరణ పరంగా ఈ సినిమా చివరి దశకి చేరుకుంది.

ముందుగా ఈ సినిమాను ఫిబ్రవరి 7వ తేదీన విడుదల చేయాలనుకున్నారు. ఆ తరువాత మనసు మార్చుకుని, ఫిబ్రవరి చివరివారంలో విడుదల చేయాలనే అభిప్రాయానికి వచ్చారు. వచ్చేనెల 22వ తేదీన విడుదల చేయాలనే నిర్ణయానికి వచ్చినట్టుగా తాజా సమాచారం. ఈ విడుదల తేదీని దృష్టిలో పెట్టుకునే ఆ దిశగా పనులు జరిపిస్తున్నట్టు తెలుస్తోంది. 'కథానాయకుడు' సినిమాను ఈ నెల 9వ తేదీ .. బుధవారం విడుదల చేశారు. 'మహానాయకుడు' సినిమాను మాత్రం శుక్రవారం రోజునే విడుదల చేయాలనే ఉద్దేశంతో వచ్చేనెల 22ను ఖరారు చేసుకున్నట్టుగా తెలుస్తోంది. త్వరలోనే అధికారిక ప్రకటన వెలువడే అవకాశం వుంది.