Salman khan: ‘లవ్ యాత్రి’గా మారిన 'లవ్ రాత్రి'!
- తన బావ హీరోగా సినిమా నిర్మించిన సల్మాన్
- వివాదాస్పదంగా మారిన టైటిల్
- నవరాత్రులను అవమానిస్తున్నట్టుగా ఉందని ఆగ్రహం
ఒక కొత్త కథనంతో హిందీలో తెరకెక్కిన ప్రేమకథా చిత్రం 'లవ్ రాత్రి'. బాలీవుడ్ కండల వీరుడు సల్మాన్ ఖాన్ తన బావ ఆయుష్ శర్మను కథానాయకుడిగా పరిచయం చేస్తూ, సొంత బ్యానర్‌లో ఈ చిత్రాన్ని నిర్మించారు. అయితే, ఈ చిత్రం టైటిల్ చాలా వివాదాస్పదమైంది. అభిరాజ్ మీనావాలా దర్శకత్వంలో తెరకెక్కిన ఈ సినిమాలో ఆయుష్ సరసన వారినా హుస్సేన్ కథానాయికగా నటించింది.
కథ ప్రకారం, నవరాత్రి పండుగ రోజున ఆయుష్, వారినా కలుస్తారు. నవరాత్రి ఉత్సవాల్లో భాగంగా వారి ప్రేమ ఎలా చిగురించిందన్న నేపథ్యంలో ఈ సినిమా తెరకెక్కింది. అయితే తాము పవిత్రంగా భావించే దేవీ నవరాత్రులను అవమానిస్తున్నట్టుగా ఈ చిత్రం టైటిల్ ఉందని హిందువులు ఆగ్రహం వ్యక్తం చేస్తున్నారు. టైటిల్ ని మార్చకపోతే తీవ్ర పరిణామాలను ఎదుర్కోవలసి వస్తుందని హెచ్చరికలు చేశారు.
ఈ క్రమంలో సినిమా టైటిల్‌లో మార్పులు చేస్తూ ‘లవ్‌యాత్రి’ అనే కొత్త టైటిల్‌తో పోస్టర్‌ను సల్మాన్ నేడు విడుదల చేశారు. ఈ సందర్భంగా ‘ఇందులో ఎలాంటి అక్షర దోషం లేదు. సినిమా టైటిల్‌ను లవ్‌యాత్రిగా మార్చాం’ అంటూ సల్మాన్ ట్వీట్ చేశాడు.
