nanduri samba siva rao: వైసీపీ అధినేత జగన్ ని కలిసిన ఏపీ మాజీ డీజీపీ సాంబశివరావు

వైసీపీ అధినేత జగన్ ని ఏపీ మాజీ డీజీపీ నండూరి సాంబశివరావు ఈరోజు కలిశారు. విశాఖపట్టణం జిల్లా అచ్యుతాపురం సమీపంలోని ధార భోగాపురంలో ప్రజా సంకల్పయాత్ర శిబిరం వద్ద జగన్ ని ఆయన కలిశారు. ఈ సందర్భంగా జగన్ కు ఆయన పుష్పగుచ్ఛం అందజేశారు. జగన్- సాంబశివరావు సుమారు 15 నిమిషాలు చర్చించుకున్నారు. ఈ విషయాన్ని వైసీపీ ఓ ప్రకటనలో తెలిపింది.

కాగా, మాజీ డీజీపీ సాంబశివరావు త్వరలో వైసీపీలో చేరనున్నట్టు, ఈ నేపథ్యంలోనే జగన్ ని ఆయన కలిసినట్టు వైస్సార్సీపీలో ఊహాగానాలు వినిపిస్తున్నాయి. ఇదిలా ఉండగా, సాంబశివరావు స్వస్థలం ప్రకాశం జిల్లా ఒంగోలు.1987లో ఆదిలాబాద్ జిల్లాలోని బెల్లంపల్లికి ఏఎస్పీగా ఆయన కెరీర్ ప్రారంభమైంది. ఆ తర్వాత పదోన్నతులు పొందుతూ డీజీపీ స్థాయికి ఎదిగారు. ఏపీ డీజీపీగా గత ఏడాది ఆయన పదవీ విరమణ పొందారు.