mahanati: యూఎస్ లో 55 ఏళ్లు పైబడిన వారికి ‘మహానటి’ ఉచిత ప్రదర్శన

ఈ నెల 9న విడుదలైన ‘మహానటి’ చిత్రానికి దేశ విదేశాల్లో మంచి ఆదరణ లభిస్తున్న విషయం తెలిసిందే. వైజయంతీ మూవీస్ సంస్థ తెరకెక్కించిన ఈ చిత్రం బాక్సాఫీస్ వద్ద దూసుకుపోతోంది. అలనాటి నటి సావిత్రి జీవిత కథ ఆధారంగా రూపొందించిన ఈ చిత్రాన్ని  చూసేందుకు కుటుంబ సమేతంగా థియేటర్లకు వెళుతున్నారు. ముఖ్యంగా చెప్పాలంటే.. యాభై ఐదేళ్లు పైబడిన వారు ‘మహానటి’ని తిలకించేందుకు ఆసక్తి చూపుతున్నారు.

ఈ విషయం తెలుసుకున్న చిత్రయూనిట్ వృద్ధాశ్రమాల్లో ఉండే వృద్ధుల కోసం ఈ సినిమాను వారి వద్దే ప్రదర్శిస్తామని ప్రకటించింది. తాజాగా,  అమెరికాలో ఈ చిత్రాన్ని పంపిణీ చేసిన నిర్వాణ సినిమాస్ సంస్థ ఓ ప్రకటన చేసింది. ‘పెద్దలందరినీ గౌరవిస్తూ.. మీ వయసు 55 ఏళ్లకు పైబడితే యూఎస్ లో ఈ శనివారం (5/26), ఆదివారం (5/27) ‘మహానటి’ని ఉచితంగా వీక్షించండి. ఈ కింద పేర్కొన్న జాబితాలో ఉన్న ప్రాంతాల్లో మాత్రమే ఈ సౌకర్యం వర్తిస్తుంది’ అంటూ సంబంధిత పోస్టర్ ను జతపరుస్తూ ఓ ట్వీట్ చేసింది. ఈ విషయాన్ని వైజయంతీ మూవీస్ సంస్థ తన ట్విట్టర్ ఖాతాలో పేర్కొంది.