Congress: లోక్ సభలో అవిశ్వాస తీర్మానం నోటీసు ఇచ్చిన కాంగ్రెస్!

తెలుగుదేశం, వైసీపీ పోరుబాటలోకి కాంగ్రెస్ పార్టీ కూడా వచ్చి చేరింది. ఇప్పటి వరకు ప్రేక్షకపాత్ర పోషించిన కాంగ్రెస్ పార్టీ... కేంద్ర ప్రభుత్వంపై అవిశ్వాస తీర్మానం నోటీసు ఇచ్చింది. ఈ నెల 27వ తేదీన అవిశ్వాసంపై చర్చ చేపట్టాలని నోటీసు అందజేసింది. ఈ సందర్భంగా కాంగ్రెస్ సీనియర్ నేత జేడీ శీలం మాట్లాడుతూ, ఏపీకి ప్రత్యేక హోదా కోసం కాంగ్రెస్ పోరాడుతోందని తాము ముందు నుంచి చెబుతున్నా ఎవరూ నమ్మలేదని... ఇప్పటికైనా వారందరికీ అర్థమవుతుందని భావిస్తున్నామని తెలిపారు.

 టీఆర్ఎస్, అన్నాడీఎంకే ఎంపీలకు తాము ఓ విన్నపం చేస్తున్నామని... వెల్ లోకి వచ్చి ఆందోళన చేస్తూ అవిశ్వాస తీర్మానంపై చర్చను అడ్డుకోవద్దని... మాట్లాడే అవకాశం మీకు వచ్చినప్పుడు, మీ సమస్యలను చెప్పుకోవాలని అన్నారు. విభజన హామీలను అమలు చేసి ఉంటే... ఈపాటికి ఏపీ బ్రహ్మాండంగా ఉండేదని తెలిపారు.