mp gokaraj: భీమవరం యూత్ కల్చరల్ క్లబ్ లో అశ్లీల నృత్యాలు... తిలకించిన ఎంపీ సోదరుడు!

పశ్చిమగోదావరి జిల్లా భీమవరంలోని యూత్ క్లబ్ లో అశ్లీల నృత్యాలు జరిగిన సంఘటన ఆలస్యంగా వెలుగులోకి వచ్చింది. భీమవరం యూత్ కల్చరల్ క్లబ్ 27వ వార్షికోత్సవం సందర్భంగా అశ్లీల నృత్యాలు జరిగినట్టు సమాచారం. ఈ నెల 24వ తేదీ అర్ధరాత్రి తర్వాత అశ్లీల నృత్యాలు నిర్వహించారు. అయితే, ఈ కార్యక్రమానికి నర్సాపూర్ ఎంపీ గోకరాజు గంగరాజు సోదరుడు నరసింహరాజు, వైసీపీ నేత నరసింహరాజు కూడా హాజరయ్యారు.

సుమారు మూడు గంటలపాటు అశ్లీల నృత్యాలు జరిగాయని, భీమవరం, తాడేపల్లిగూడెం, తణుకు నుంచి తీసుకువచ్చిన డ్యాన్సర్లతో ఈ నృత్యాలు చేయించినట్టు సమాచారం. క్లబ్ సభ్యులు, వీఐపీలను మాత్రమే ఈ కార్యక్రమానికి ఆహ్వానించారని తెలుస్తోంది. అశ్లీల నృత్యాలకు సంబంధించిన వీడియోలు తాజాగా బయటపడంతో కలకలం రేపుతోంది. కాగా, ఈ సంఘటనపై ఏపీ మహిళా కాంగ్రెస్ అధ్యక్షురాలు సుంకర పద్మశ్రీ స్పందిస్తూ, ఇందుకు బాధ్యులైన వారిని అరెస్ట్ చేయాలని డిమాండ్ చేశారు.