pavan kalyan: 'అజ్ఞాతవాసి'కి హాలీవుడ్ సినిమా ఆధారమా?

పవన్ కల్యాణ్ .. త్రివిక్రమ్ కాంబినేషన్లో గతంలో వచ్చిన 'జల్సా' .. 'అత్తారింటికి దారేది' సినిమాలు ఘన విజయాలను సొంతం చేసుకున్నాయి. దాంతో ఈ ఇద్దరి కాంబినేషన్లో మూడవ సినిమాగా రూపొందుతోన్న 'అజ్ఞాతవాసి'పై అంచనాలు భారీగా వున్నాయి. ఈ నేపథ్యలో 'ది హెయిర్ అప్పారెంట్' అనే ఓ హాలీవుడ్ సినిమా నుంచి స్ఫూర్తిని పొందిన త్రివిక్రమ్, ఈ కథను తయారు చేసుకున్నాడనే టాక్ ఫిల్మ్ నగర్లో వినిపిస్తోంది.

 శ్రీమంతుడైన ఒక వ్యక్తికి ఇద్దరు భార్యలు వుంటారు. హఠాత్తుగా ఆయన చనిపోవడంతో, ఆయన ఆస్తిపాస్తులను సొంతం చేసుకోవడానికి ఒక ముఠా ప్లాన్ చేస్తుంది. అయితే ఆ శ్రీమంతుడి మొదటి భార్యకి ఒక కొడుకుంటాడు. అతను ఎక్కడ ఉన్నాడనే విషయం ఎవరికీ తెలియదు. ఆయన కోసం సాగిన అన్వేషణ .. ఆయన వచ్చాక చోటుచేసుకునే పరిణామాలతో హాలీవుడ్ సినిమా కొనసాగుతుంది. ఈ కథకు .. 'అజ్ఞాతవాసి'కి చాలా దగ్గర పోలికలు ఉన్నాయని అంటున్నారు. కథను తనదైన స్టైల్లో చెప్పడంలో త్రివిక్రమ్ నేర్పరి కనుక, తెరపై ఆయన ఎలాంటి మేజిక్ చేశాడో చూడాలి మరి.