love marriage: ఆసుపత్రికి వెళ్లి మరీ ప్రేయసిని పెళ్లాడిన ప్రియుడు!

ప్రేమించిన వారిని మోసం చేస్తున్న ఈ రోజుల్లో అనారోగ్యంతో ఆసుపత్రిలో చేరిన ప్రియురాలిని వివాహం చేసుకుని అసలైన ప్రేమను చాటిన ఘటన కోల్ కతాలో చోటుచేసుకుంది. సౌదీ అరేబియాలో మెకానికల్ ఇంజనీర్ గా పని చేసే ఆలం స్వస్థలం కోల్‌ కతా. అదే ప్రాంతానికి చెందిన హేరాతో అతను ప్రేమలో పడ్డాడు. ఆమె గురించి తన కుటుంబ సభ్యులకి చెప్పి వివాహానికి ఒప్పించాడు. హేరా కూడా ఆలంతో వివాహానికి కుటుంబ సభ్యులను ఒప్పించింది. ఈ నేపథ్యంలో వారికి వివాహం చేయాలని కుటుంబ సభ్యులు ముహూర్తం నిశ్చయించారు.

వివాహ సమయం దగ్గరపడుతున్న సమయంలో హేరాకి తీవ్ర కడుపునొప్పి వచ్చింది. దీంతో ఆమెను కుటుంబ సభ్యులు ఆసుపత్రిలో చేర్చారు. విషయం తెలిసిన ఆలం సౌదీఅరేబియా నుంచి కోల్ కతా చేరి, కుటుంబ సభ్యులను ఒప్పించి ఆసుపత్రిలోనే వివాహమాడాడు. అనారోగ్యంతో బాధపడుతున్న హేరాను కుటుంబ సభ్యులు ఎర్రటి లెహంగాలో ముస్తాబు చేయగా సంప్రదాయ పద్ధతిలో ఆమెను ఆసుపత్రిలోనే ఆలం వివాహం చేసుకున్నాడు. దీనిపై హేరా కుటుంబ సభ్యులు హర్షం వ్యక్తం చేస్తున్నారు.