sandeep kishan: ఇది డబ్బింగ్ సినిమా కాదు .. నేను పరాయివాడినీ కాదు!: సందీప్ కిషన్

మాస్ ఆడియన్స్ లో సందీప్ కిషన్ కి మంచి గుర్తింపు వుంది. తెలుగు .. తమిళ భాషల్లో ఆయన వరుస సినిమాలు చేస్తూ వెళుతున్నాడు. ఆయన తాజా చిత్రంగా 'కేరాఫ్ సూర్య' ఈ నెల 10వ తేదీన ప్రేక్షకుల ముందుకు రానుంది. ఈ నేపథ్యంలో ఇండస్ట్రీలోని కొంతమంది దీనిని డబ్బింగ్ సినిమాగా ప్రస్తావించడం గురించి సందీప్ కిషన్ ఎమోషనల్ అయ్యాడు.

ఈ మధ్య తాను ఎక్కువగా తమిళ సినిమాలు చేస్తుండటం వలన తనని పరాయివాడిగా భావిస్తున్నారనీ, 'కేరాఫ్ సూర్య' సినిమాను డబ్బింగ్ సినిమా అని అంటున్నారని ఆయన ఆవేదన వ్యక్తం చేశాడు. నిజంగా డబ్బింగ్ సినిమా అయితే ఆ విషయం చెప్పడానికి తాను ఎంత మాత్రం ఆలోచించననీ, కానీ ఈ సినిమాను తెలుగు .. తమిళ భాషల్లో ఒకేసారి తెరకెక్కించడం జరిగిందని అన్నాడు. ఇది అచ్చమైన తెలుగు సినిమా అనడంలో ఎంతమాత్రం సందేహం లేదనీ, ద్విభాషా చిత్రాలను చేస్తోన్న తనని ఇలా పరాయివాడిగా చూడటం కరెక్ట్ కాదనే అభిప్రాయాన్ని వ్యక్తం చేశాడు.