sporting moustache: అందంగా మీసాలు పెంచుకున్నాడని దళిత యువకుడిపై దాడి.. కత్తిపోటు
- గుజ‌రాత్‌లోని గాంధీన‌గ‌ర్ లింబోద‌ర‌లో మరో దారుణ ఘటన
- 17 ఏళ్ల మ‌హేరియాకు తీవ్రగాయాలు
- అట్రాసిటీ యాక్ట్ కింద దుండ‌గుల‌పై కేసు న‌మోదు
- ఆందోళనకు దిగుతోన్న దళితులు
గుజ‌రాత్‌లోని గాంధీన‌గ‌ర్ లింబోద‌ర‌లో మీసం అందంగా పెంచుకున్నాడని ఓ దళిత యువకుడిపై గుర్తు తెలియ‌ని వ్య‌క్తులు దాడి చేసి కత్తితో పొడిచి పారిపోయారు. ఈ గ్రామంలో కొన్ని రోజుల వ్య‌వ‌ధిలోనే ఇటువంటి దారుణ ఘటన జ‌ర‌గ‌డం ఇది మూడవ సారి. 17 ఏళ్ల మహేరియా అనే దళిత యువ‌కుడు అందంగా మీసాలు పెంచుకుని తిరుగుతున్నాడు. అది చూసి ఓర్వ‌లేక కొంద‌రు యువ‌కులు ఈ దారుణానికి పాల్ప‌డ్డార‌ని, కత్తితో మహేరియా వీపుపై పొడిచేశారని పోలీసులు తెలిపారు.
కొన్ని రోజుల క్రితం కూడా త‌మ కుమారుడిపై కొంద‌రు గుర్తు తెలియ‌ని వ్య‌క్తులు దాడి చేశార‌ని, అయితే, తాము అప్పట్లో పోలీసుల‌కు ఫిర్యాదు చేయ‌లేద‌ని మహేరియా త‌ల్లిదండ్రులు చెప్పారు. ప్ర‌స్తుతం మహేరియా ఆసుప‌త్రిలో చికిత్స పొందుతున్నాడు. అత‌డి వీపుపై ఏడు కుట్లు ప‌డ్డాయ‌ని వైద్యులు చెప్పారు. ఈ ఘటనపై అక్క‌డి పోలీసులు మాట్లాడుతూ.. అట్రాసిటీ యాక్ట్ కింద స‌ద‌రు దుండ‌గుల‌పై తాము కేసు న‌మోదు చేశామ‌ని, వారి కోసం గాలిస్తున్నామని చెప్పారు.
ఇదే గ్రామంలో గ‌తంలో దళిత యువ‌కుల‌పై దాడి చేసిన క్ష‌త్రియ క‌మ్యూనిటీ యువ‌కుల‌పై పోలీసులు ఇప్ప‌టికే కేసులు పెట్టారు. ఈ ఘటనపై ఆ గ్రామ స‌ర్పంచ్ మీడియాతో మాట్లాడుతూ.. ఎల్ల‌ప్పుడూ ప్ర‌శాంతంగా ఉండే త‌మ గ్రామంలో ఉన్న‌ట్టుండి ఇటువంటి ఘ‌ట‌న‌లు ఎందుకు జ‌రుగుతున్నాయో అర్థం కావ‌ట్లేద‌ని వ్యాఖ్యానించారు. ఈ ఘటనపై దళిత క‌మ్యూనిటీకి చెందిన ప్ర‌జ‌లు ఆందోళ‌న‌లకు దిగుతున్నారు.
