Saudi: సౌదీ అరేబియా మరో సంచలన నిర్ణయం.. 45 ఏళ్ల పురుషాధిక్యానికి చెల్లుచీటీ.. ఫత్వా జారీకి మహిళలకు అనుమతి!

ఇటీవల వరుసగా సంచలన నిర్ణయాలు తీసుకుంటున్న సౌదీ అరేబియా మరో సంచలన నిర్ణయానికి ఓటేసింది. 45 ఏళ్ల పురుషాధిపత్యానికి చెక్ చెప్పేలా ఫత్వా జారీకి మహిళలకు అనుమతిస్తూ నిర్ణయం తీసుకుంది. ఈ మేరకు శుక్రవారం సౌదీ అడ్వైజరీ కౌన్సిల్‌లో జరిగిన ఓటింగ్ ద్వారా ఈ చారిత్రక నిర్ణయం తీసుకుంది.  

ప్రభుత్వ తాజా నిర్ణయంతో చట్టబద్ధంగా శిక్షలు విధించే అవకాశం మహిళలకు దక్కినట్టు అయింది. నాలుగు రోజుల క్రితమే మహిళల డ్రైవింగ్‌పై ఉన్న నిషేధాన్ని ఎత్తివేసిన సౌదీ, ఈ నెలలోనే స్టేడియంలోకి మహిళల ప్రవేశంపై ఉన్న నిషేధాన్ని కూడా ఎత్తివేసి వారిని అనుమతించింది.

ఇస్లామిక్ న్యాయ నిపుణులు ఈ నిర్ణయాన్ని స్వాగతిస్తూ హర్షం వ్యక్తం చేస్తున్నారు. షరియా చట్టాల్లో నిపుణుడైన అల్-బిషి మాట్లాడుతూ ముస్లిం సమాజంలో మహిళలది కీలకపాత్ర అని పేర్కొన్నారు. తాజా నిర్ణయం వల్ల ఈ ఇస్లామిక్ సమాజానికి మరింత మేలు జరుగుతుందని అభిప్రాయపడ్డారు.