లక్ష్మీ నరసింహస్వామి క్షేత్ర మహిమ

లక్ష్మీనరసింహస్వామి ఆవిర్భవించిన పరమ పవిత్రమైన క్షేత్రాలలో 'గీసుకొండ' ఒకటి. వరంగల్ జిల్లాలో ఈ క్షేత్రం అలరారుతోంది. ఇక్కడి కొండపై లక్ష్మీనరసింహస్వామి కొలువుదీరి వున్నాడు. కాకతీయుల కాలంలో ఈ క్షేత్రం ఎంతో వైభవంగా వెలుగొందినట్టు చరిత్ర చెబుతోంది. ఈ క్షేత్రాన్ని దర్శించు కోవడం వలన .. ఈ స్వామిని పూజించడం వలన గండాలు నుంచి గట్టెక్కడం జరుగుతుందని అంటారు.

ఈ క్షేత్రంలో 'చింతామణి' కోనేరు దర్శనమిస్తుంది. ఈ కోనేటిలో స్నానం చేయడం వలన ధర్మబద్ధమైన కోరికలు నెరవేరతాయని చెబుతారు. ఈ కోనేరులోకి నిరంతరం నీటి ధార చేరుతూ ఉంటుంది. ఈ నీరు ఎక్కడి నుంచి వస్తున్నది ఎవరికీ తెలియక పోవడం విశేషం. ఆ విషయాన్ని కనుక్కోవడానికి కొంతమంది ప్రయత్నించి విఫలమయ్యారు. కోనేరులోకి వచ్చే నీటి ధార .. అందులో స్నానం చేసే వారి సంఖ్యను బట్టి పెరగడం .. తరగడం జరుగుతూ ఉంటుందని ఇక్కడి వాళ్లు చెబుతుంటారు. ఇది లక్ష్మీ నరసింహస్వామి మహిమగా వాళ్లు విశ్వసిస్తుంటారు.