పసిడి ప్రియులకు ఊరట... భారీగా తగ్గిన బంగారం ధర

రికార్డు స్థాయిలో దూసుకుపోయిన బంగారం ధరకు నేడు బ్రేక్ పడింది. అంతర్జాతీయ పరిణామాల నేపథ్యంలో ఆల్ టైమ్ గరిష్ఠ స్థాయి నుంచి పసిడి ధర గణనీయంగా తగ్గింది. దేశీయ బులియన్ మార్కెట్లో 10 గ్రాముల 24 క్యారెట్ల బంగారం ధర సుమారు రూ. 3,000 వరకు దిగిరావడం పసిడి కొనుగోలుదారులకు కొంత ఊరటనిచ్చింది.

బుధవారం ఉదయం 11 గంటల సమయానికి బులియన్ మార్కెట్లో 24 క్యారెట్ల బంగారం ధర రూ. 98,700 వద్ద ట్రేడ్ అయింది. బంగారం బాటలోనే వెండి ధర కూడా స్వల్పంగా తగ్గింది. కిలో వెండి ధర బులియన్ మార్కెట్‌లో రూ. 98,720 గా నమోదైంది.

అంతకుముందు రోజు, మంగళవారం నాడు మల్టీ కమోడిటీ ఎక్స్ఛేంజ్ (ఎంసీఎక్స్)లో జూన్ నెల డెలివరీ కాంట్రాక్టు బంగారం ధర ఇంట్రాడేలో రూ. 99,358 వద్ద సరికొత్త రికార్డును సృష్టించిన విషయం తెలిసిందే. అయితే, బుధవారం ట్రేడింగ్‌లో ఈ ధర కూడా తగ్గుముఖం పట్టింది. ఉదయం రూ. 96,500 వద్ద ప్రారంభమైన ధర, ఒక దశలో రూ. 95,457 కనిష్ఠ స్థాయిని తాకింది. అంతర్జాతీయ మార్కెట్‌లో కూడా ఔన్సు పసిడి ధర 3,320.40 డాలర్లకు తగ్గింది. మంగళవారం నాడు ఈ ధర 3,467 డాలర్లుగా ఉంది.

ప్రపంచ మార్కెట్‌లో చోటుచేసుకున్న పరిణామాలే దేశీయంగా బంగారం ధర తగ్గడానికి కారణమని మార్కెట్ నిపుణులు విశ్లేషిస్తున్నారు. ముఖ్యంగా, అమెరికా అధ్యక్షుడు డొనాల్డ్ ట్రంప్ చైనాతో వాణిజ్య ఒప్పందంపై సానుకూలంగా మాట్లాడటంతో అమెరికా స్టాక్ మార్కెట్లు పుంజుకున్నాయని, డాలర్ విలువ కూడా బలపడిందని వారు తెలిపారు. 

సాధారణంగా డాలర్ బలపడితే, బంగారం వంటి సురక్షిత పెట్టుబడులకు ఆదరణ తగ్గుతుంది. ఈ పరిణామాలన్నీ బంగారం ధరపై ఒత్తిడి పెంచాయని నిపుణులు చెబుతున్నారు.