డబ్ల్యూపీఎల్: ల్యానింగ్, లిచ్‌ఫీల్డ్ విధ్వంసం... ముంబై ముందు భారీ టార్గెట్

మహిళల ప్రీమియర్ లీగ్ (WPL) 2026లో భాగంగా ముంబై ఇండియన్స్‌తో జరుగుతున్న మ్యాచ్‌లో యూపీ వారియర్జ్ భారీ స్కోరు సాధించింది. కెప్టెన్ మెగ్ ల్యానింగ్ (70), ఫోబ్ లిచ్‌ఫీల్డ్ (61) అర్ధసెంచరీలతో విరుచుకుపడటంతో నిర్ణీత 20 ఓవర్లలో 8 వికెట్ల నష్టానికి 187 పరుగులు చేసింది. ముంబై ఇండియన్స్‌కు 188 పరుగుల భారీ లక్ష్యాన్ని నిర్దేశించింది.

నవీ ముంబైలోని డీవై పాటిల్ స్పోర్ట్స్ అకాడమీలో జరుగుతున్న ఈ మ్యాచ్‌లో టాస్ గెలిచిన ముంబై ఇండియన్స్ బౌలింగ్ ఎంచుకుంది. యూపీకి ఆరంభంలోనే ఎదురుదెబ్బ తగిలింది. ఓపెనర్ కిరణ్ నవ్‌గిరె (0) డకౌట్‌గా వెనుదిరిగింది. ఆ తర్వాత క్రీజులోకి వచ్చిన ల్యానింగ్, లిచ్‌ఫీల్డ్ అద్భుతమైన భాగస్వామ్యం నెలకొల్పారు. వీరిద్దరూ రెండో వికెట్‌కు 119 పరుగులు జోడించి జట్టును పటిష్ట స్థితిలో నిలిపారు. ల్యానింగ్ 45 బంతుల్లో 11 ఫోర్లు, 2 సిక్సర్లతో 70 పరుగులు చేయగా, లిచ్‌ఫీల్డ్ 37 బంతుల్లో 7 ఫోర్లు, 3 సిక్సర్లతో 61 పరుగులు సాధించింది.

చివర్లో హర్లీన్ డియోల్ (25), క్లో ట్రయాన్ (21) వేగంగా ఆడటంతో యూపీ స్కోరు 180 దాటింది. అయితే, చివరి రెండు ఓవర్లలో యూపీ వరుసగా వికెట్లు కోల్పోయింది. ముంబై బౌలర్లలో అమీలియా కెర్ 4 ఓవర్లలో 28 పరుగులిచ్చి 3 వికెట్లు పడగొట్టింది. నాట్ సివర్-బ్రంట్ రెండు వికెట్లు తీయగా, హేలీ మాథ్యూస్, నికోలా కేరీ, అమన్‌జోత్ కౌర్ తలో వికెట్ దక్కించుకున్నారు.