పీఎఫ్ ఖాతాదారులకు గుడ్ న్యూస్... ఏప్రిల్ నుంచి ఇలా కూడా డబ్బు విత్‌డ్రా చేసుకోవచ్చు!

దేశవ్యాప్తంగా ఉన్న సుమారు 8 కోట్ల మంది ఈపీఎఫ్‌వో (ఉద్యోగుల భవిష్య నిధి సంస్థ) సభ్యులకు ఇది శుభవార్త. పీఎఫ్ ఖాతా నుంచి డబ్బులు ఉపసంహరించుకునే ప్రక్రియను మరింత సులభతరం చేస్తూ కేంద్రం కీలక నిర్ణయం తీసుకుంది. ఈ ఏడాది ఏప్రిల్ నాటికి యూపీఐ (యూనిఫైడ్ పేమెంట్స్ ఇంటర్‌ఫేస్) ద్వారా పీఎఫ్ డబ్బులను నేరుగా బ్యాంకు ఖాతాల్లోకి బదిలీ చేసుకునే సౌకర్యం అందుబాటులోకి రానుందని కార్మిక మంత్రిత్వ శాఖ వర్గాలు వెల్లడించాయి.

ప్రస్తుతం పీఎఫ్ డబ్బులు విత్‌డ్రా చేయాలంటే క్లెయిమ్ ఫారమ్‌లు సమర్పించాల్సి ఉండగా, ఈ ప్రక్రియకు కొంత సమయం పడుతోంది. అయితే, కొత్త విధానం అమల్లోకి వస్తే, సభ్యులు తమ లింక్ అయిన బ్యాంకు ఖాతాకు యూపీఐ పిన్ ఉపయోగించి సులభంగా, వేగంగా నగదు బదిలీ చేసుకోవచ్చు. ఈ వ్యవస్థను సజావుగా అమలు చేయడానికి ఈపీఎఫ్‌వో అవసరమైన సాఫ్ట్‌వేర్ మార్పులు చేస్తోంది.

ఇప్పటికే ఆటో-సెటిల్‌మెంట్ విధానంలో అనారోగ్యం, విద్య, వివాహం, గృహ నిర్మాణం వంటి అవసరాల కోసం చేసుకునే క్లెయిమ్‌లను 3 రోజుల్లోనే పరిష్కరిస్తున్నారు. ఈ విధానంలో పరిమితిని రూ.1 లక్ష నుంచి రూ.5 లక్షలకు పెంచారు. దీనికి తోడు, పాక్షిక ఉపసంహరణ నిబంధనలను కూడా సరళీకరించారు. గతంలో ఉన్న 13 సంక్లిష్ట నియమాలను మూడు సాధారణ కేటగిరీలుగా మార్చారు.

కొత్త నిబంధనల ప్రకారం, సభ్యులు తమ ఖాతాలోని అర్హత ఉన్న బ్యాలెన్స్‌లో 100 శాతం వరకు విత్‌డ్రా చేసుకోవచ్చు. అయితే, సభ్యులు చక్రవడ్డీ ప్రయోజనాలు, 8.25 శాతం వడ్డీ రేటును నష్టపోకుండా ఉండాలంటే మాత్రం ఖాతాలో కనీసం 25 శాతం నిల్వలను కొనసాగించాల్సి ఉంటుంది. 

కాగా, యూపీఐ ఆధారిత సేవలతో ఈపీఎఫ్‌వో సేవలు బ్యాంకింగ్ స్థాయికి చేరుకుంటాయని, ఏటా వచ్చే 5 కోట్లకు పైగా క్లెయిమ్‌ల ప్రాసెసింగ్ భారం తగ్గుతుందని అధికారులు భావిస్తున్నారు.