రాత్రివేళ దారితప్పిన విదేశీ పర్యాటకురాలు... మహిళా ర్యాపిడో డ్రైవర్ సాయం

గోవాలో ఓ మహిళా ర్యాపిడో డ్రైవర్ చూపిన మానవత్వం ఇప్పుడు సోషల్ మీడియాలో ప్రశంసలు అందుకుంటోంది. రాత్రిపూట దారితప్పి భయంతో వణికిపోతున్న ఓ విదేశీ మహిళకు అండగా నిలిచి, ఆమెను సురక్షితంగా గమ్యస్థానానికి చేర్చి రియల్ హీరోగా నిలిచింది. ఈ ఘటనకు సంబంధించిన వీడియో వైరల్ కావడంతో నెటిజన్లు ఆమెపై ప్రశంసల వర్షం కురిపిస్తున్నారు.

వివరాల్లోకి వెళితే, సింధు కుమారి అనే ర్యాపిడో రైడర్ గోవాలో రాత్రి 10 గంటల సమయంలో ప్రయాణిస్తుండగా, ఓ విదేశీ మహిళ ఒంటరిగా ఏడుస్తూ కనిపించింది. ఆమె బెటాల్‌బెటిమ్ బీచ్ నుంచి కొల్వా బీచ్‌కు నడుచుకుంటూ వచ్చింది. గూగుల్ మ్యాప్స్ పనిచేయకపోవడంతో దారితప్పి, చుట్టూ ఎవరూ లేక భయాందోళనకు గురైంది.

వెంటనే సింధు తన బైక్‌ను ఆపి, ఆ మహిళను పలకరించింది. ఆమెకు ధైర్యం చెప్పి, తన బైక్‌పై ఎక్కించుకుని ఆమె బస చేస్తున్న హోటల్ కోకోనట్ గ్రోవ్ వద్ద సురక్షితంగా దింపింది. గమ్యం చేరగానే ఆ విదేశీ మహిళ భావోద్వేగంతో సింధును గట్టిగా హత్తుకుని కృతజ్ఞతలు తెలిపింది. ప్రయాణానికి డబ్బు ఇవ్వబోగా, సింధు కుమారి సున్నితంగా తిరస్కరించింది.

ఈ సంఘటన వీడియోను ‘@gharkekalesh’ అనే ఎక్స్ ఖాతాలో పోస్ట్ చేయడంతో ఇది వైరల్‌గా మారింది. "యాప్ లు విఫలమైనప్పుడు మానవత్వం గెలుస్తుంది" "ఇదే నిజమైన భారతదేశం" "మహిళలు ముందుంటే ప్రపంచం మరింత సురక్షితంగా ఉంటుంది" అంటూ నెటిజన్లు కామెంట్లు పెడుతున్నారు. ఈ ఘటన ఒంటరిగా ప్రయాణించే మహిళల భద్రత విషయంలో మహిళా డ్రైవర్ల ప్రాముఖ్యతను మరోసారి గుర్తుచేసింది. సింధు కుమారి లాంటి వారు మన దేశంలో మానవత్వం ఇంకా బతికే ఉందని నిరూపిస్తున్నారని పలువురు అభిప్రాయపడుతున్నారు.