పొగతాగడం కంటే ఉద్యోగమే డేంజర్.. టెక్కీకి డాక్టర్ షాకింగ్ వార్నింగ్!

ఓ టెక్ ఉద్యోగి తన ఆరోగ్యం గురించి సోషల్ మీడియాలో చేసిన పోస్ట్ ప్రస్తుతం వైరల్ అవుతోంది. తన ఉద్యోగంలో ఉన్న తీవ్రమైన ఒత్తిడి... ధూమపానం కంటే ప్రమాదకరమని తన డాక్టర్ హెచ్చరించినట్లు అతను పేర్కొన్నాడు. కార్పొరేట్ ఉద్యోగుల చర్చా వేదిక అయిన 'బ్లైండ్' యాప్‌లో అతను ఈ అనుభవాన్ని పంచుకున్నాడు.

హిందుస్థాన్ టైమ్స్ కథనం ప్రకారం, ఈ అజ్ఞాత టెక్కీ గత ఐదేళ్లుగా ఒకే డాక్టర్‌ను సంప్రదిస్తున్నాడు. ఈ మధ్య కాలంలో తన ఆరోగ్యం క్షీణిస్తోందని, గతంలో ఆందోళన తగ్గడానికి మందులు సూచించిన డాక్టర్ ఇప్పుడు బరువు పెరగడాన్ని కూడా గమనించారని తన పోస్టులో వివరించాడు. 

ఇటీవల తనను పరీక్షించిన డాక్టర్, పనిలో ఉన్న భరించలేని ఒత్తిడి వల్లే జీర్ణవ్యవస్థ సమస్యలతో పాటు ఇతర ఆరోగ్య సమస్యలు వస్తున్నాయని చెప్పారని పేర్కొన్నాడు. ఆరోగ్యం కుదుటపడాలంటే వెంటనే పని నుంచి విరామం తీసుకోవాలని డాక్టర్ సలహా ఇచ్చినట్లు వెల్లడించాడు.

ఈ పోస్ట్ ఆన్‌లైన్‌లో పెద్ద చర్చకు దారితీసింది. చాలా మంది టెక్ ఉద్యోగులు తాము ఎదుర్కొంటున్న పని ఒత్తిడి, బర్న్‌అవుట్ అనుభవాలను పంచుకుంటున్నారు. ఈ పోస్ట్ కింద మరో యూజర్ స్పందిస్తూ, "నాకు 32 ఏళ్లు. డబ్బుంది కానీ ఆరోగ్యం లేదు. పని ఒత్తిడితో నా ఆరోగ్యాన్ని పాడుచేసుకున్నాను. ఆరోగ్యం కంటే ఏదీ ముఖ్యం కాదు. నువ్వు ఆ బ్రేక్ తీసుకోవాలి" అని సలహా ఇచ్చారు.

ఒత్తిడితో గుండెకు ముప్పు ఎలా? 
‘జర్నల్ ఆఫ్ ది అమెరికన్ హార్ట్ అసోసియేషన్’లో ప్రచురితమైన ఒక అధ్యయనం ప్రకారం, తీవ్రమైన పని ఒత్తిడి ఉన్నవారిలో గుండె ఆరోగ్యం దెబ్బతినే ప్రమాదం ఎక్కువగా ఉంది. ఒత్తిడికి గురైనప్పుడు శరీరంలో కార్టిసాల్, అడ్రినలిన్ వంటి హార్మోన్లు అధికంగా విడుదలవుతాయి. ఇవి రక్తపోటును, రక్తంలో చక్కెర స్థాయిలను పెంచుతాయి. 

యూసీ డేవిస్ హెల్త్ పరిశోధన ప్రకారం, ఈ ఒత్తిడి నేరుగా గుండె కణాలలో వాపును (inflammation) ప్రేరేపిస్తుంది. "పర్యావరణ ఒత్తిడి నేరుగా గుండె కణాల్లో వాపును కలిగించి, హానికరమైన అణువులను విడుదల చేస్తుందని మా పరిశోధనలో తొలిసారిగా గుర్తించాం" అని యూసీ డేవిస్ హెల్త్ లో కార్డియోవాస్కులర్ ప్రొఫెసర్ పద్మిని శిరీష్ వివరించారు.

ఇతర ఆరోగ్య సమస్యలు, ఆర్థిక నష్టం
ఒత్తిడి వల్ల విడుదలయ్యే కార్టిసాల్ హార్మోన్ ఆకలిని పెంచి, అనారోగ్యకరమైన ఆహారం వైపు మొగ్గు చూపేలా చేస్తుంది. దీనివల్ల బరువు పెరగడం, జీవక్రియ సమస్యలు తలెత్తుతాయి. మరోవైపు, పని ఒత్తిడి వల్ల ప్రపంచ ఆర్థిక వ్యవస్థకు ఏటా 1 ట్రిలియన్ డాలర్ల ఉత్పాదకత నష్టం వాటిల్లుతోందని అంచనా. ఇదే కారణంతో ప్రతీ సంవత్సరం పనిదినాలు వృథా అవుతున్నాయి.

"ఎంత పని చేస్తున్నామనేది కాదు, ఆ పని వాతావరణం ఎలా ఉందనేది ఉద్యోగి ఆరోగ్యంపై ప్రభావం చూపుతుంది" అని లూయిస్‌విల్లే యూనివర్సిటీ పరిశోధకులు డాక్టర్ బ్రాడ్ షక్ పేర్కొన్నారు. ఈ నేపథ్యంలో, ఉద్యోగుల మానసిక, శారీరక ఆరోగ్యాన్ని కాపాడేందుకు అనువైన పనిగంటలు, ఒత్తిడిని తగ్గించే వాతావరణం కల్పించడంపై సంస్థలు దృష్టి పెట్టాలని నిపుణులు, ప్రపంచ ఆరోగ్య సంస్థ సూచిస్తున్నాయి.