గల్ఫ్ దేశాల నిషేధంతో 'ధురంధర్' చిత్రానికి రూ. 90 కోట్ల నష్టం

బాలీవుడ్ స్టార్ రణ్‌వీర్ సింగ్ కథానాయకుడిగా నటించిన స్పై యాక్షన్ థ్రిల్లర్ ‘ధురంధర్’ బాక్సాఫీస్ వద్ద భారీ విజయం సాధించినప్పటికీ, ఆర్థికంగా గట్టి దెబ్బ తగిలింది. గల్ఫ్ దేశాల్లో ఈ చిత్రంపై నిషేధం విధించడంతో సుమారు రూ. 90 కోట్ల మేర నష్టం వాటిల్లినట్లు చిత్ర ఓవర్సీస్ డిస్ట్రిబ్యూటర్ ప్రణబ్ కపాడియా వెల్లడించారు.

ఆదిత్య ధర్ దర్శకత్వంలో తెరకెక్కిన ఈ సినిమాలో పాకిస్థాన్ వ్యతిరేక సందేశాలు ఉన్నాయన్న కారణంతో పలు దేశాలు దీని విడుదలకు అనుమతి నిరాకరించాయి. బహ్రెయిన్, కువైట్, ఒమన్, ఖతార్, సౌదీ అరేబియా, యూఏఈతో పాటు పాకిస్థాన్‌లో కూడా ఈ సినిమా విడుదల కాలేదు. దీనివల్ల భారీగా బాక్సాఫీస్ ఆదాయం కోల్పోవాల్సి వచ్చిందని డిస్ట్రిబ్యూటర్ తెలిపారు.

ప్రణబ్ కపాడియా మాట్లాడుతూ.. "మేము కనీసం 10 మిలియన్ డాలర్ల (సుమారు రూ. 90 కోట్లు) బాక్సాఫీస్ నష్టాన్ని చవిచూశామని భావిస్తున్నాను. ఎందుకంటే యాక్షన్ చిత్రాలు మిడిల్ ఈస్ట్‌లో బాగా ఆడతాయి. అయితే, ప్రతి దేశం యొక్క నిబంధనలను, వారి అభిప్రాయాలను మనం గౌరవించాలి" అని వివరించారు. ఇదే తరహాలో గతంలో ‘ఫైటర్’ వంటి చిత్రాలు కూడా అక్కడ విడుదల కాలేదని ఆయన గుర్తుచేశారు.

ఈ నష్టాలు ఉన్నప్పటికీ, డిసెంబర్ 5న విడుదలైన ‘ధురంధర్’ ప్రపంచవ్యాప్తంగా రూ. 1,100 కోట్లకు పైగా గ్రాస్ వసూళ్లు సాధించి రికార్డులు సృష్టించింది. 2025లో అత్యధిక ఓవర్సీస్ వసూళ్లు సాధించిన భారతీయ చిత్రంగా నిలిచింది. ఈ విజయంతో చిత్రబృందం ‘ధురంధర్ 2’ సీక్వెల్‌ను కూడా ప్రకటించింది. ఈ సీక్వెల్ 2026 మార్చి 19న విడుదల కానుంది.