బడ్జెట్ రూ.710 కోట్లు... కలెక్షన్లు రూ.19 వేల కోట్లు... చైనా సినిమా సంచలనం

2025 సంవత్సరం ప్రపంచ బాక్సాఫీస్‌ను ఒక చైనా యానిమేషన్ చిత్రం శాసించింది. 'నే ఝా 2' పేరుతో వచ్చిన ఈ సినిమా, ఏకంగా 2.2 బిలియన్ డాలర్లు (సుమారు రూ.19 వేల కోట్లు) వసూలు చేసి ఈ ఏడాది ప్రపంచంలోనే అతిపెద్ద హిట్‌గా అవతరించింది. హాలీవుడ్ భారీ చిత్రాలను సైతం వెనక్కి నెట్టి ఈ ఘనత సాధించడం విశేషం.

2019లో భారీ విజయం సాధించిన 'నే ఝా' చిత్రానికి సీక్వెల్‌గా వచ్చిన ఈ సినిమాను చైనా పురాణాల ఆధారంగా తెరకెక్కించారు. విధిని ఎదిరించి నిలిచిన ఓ బాలుడి కథతో ఫాంటసీ అడ్వెంచర్‌గా రూపొందించారు. కేవలం రూ.710 కోట్ల బడ్జెట్‌తో నిర్మించిన ఈ చిత్రం, మాండరిన్ భాషలో విడుదలై ఆ తర్వాత ఇంగ్లిష్, హిందీ వంటి భాషల్లోకి డబ్ అయింది. ఈ ఏడాది జనవరిలో చైనాలో, ఏప్రిల్‌లో భారత్‌లో విడుదలైంది.

ఈ భారీ విజయంతో 'నే ఝా 2' ప్రపంచవ్యాప్తంగా అత్యధిక వసూళ్లు సాధించిన చిత్రాల జాబితాలో ఐదో స్థానానికి చేరింది. 'అవతార్', 'అవెంజర్స్: ఎండ్‌గేమ్', 'అవతార్ 2', 'టైటానిక్' వంటి దిగ్గజ చిత్రాల తర్వాత ఇది నిలిచింది. ప్రస్తుతం ఈ సినిమా ఆపిల్ టీవీ ఓటీటీ ప్లాట్‌ఫామ్‌లో స్ట్రీమింగ్ అవుతోంది.

భారతీయ సినిమాల్లో ఈ ఏడాది 'ధురంధర్' వంటి చిత్రాలు భారీ వసూళ్లు సాధించినా, ప్రపంచ స్థాయిలో 'నే ఝా 2' దరిదాపుల్లోకి రాలేకపోయాయి. ఇక మన యానిమేషన్ విభాగంలో ‘మహావతార్ నరసింహ’ రూ.320 కోట్లు వసూలు చేసి మంచి విజయం సాధించింది. ఏదేమైనా, 'నే ఝా 2' విజయం చైనా చిత్ర పరిశ్రమ సత్తాను ప్రపంచానికి మరోసారి చాటి చెప్పింది.