మెస్సీ ఈవెంట్‌లో సీఎంకు నిరసన సెగ.. ‘ఏక్యూఐ’ నినాదాలతో దద్దరిల్లిన స్టేడియం!

దేశ రాజధాని ఢిల్లీని వాయు కాలుష్యం ఉక్కిరిబిక్కిరి చేస్తున్న వేళ, ముఖ్యమంత్రి రేఖా గుప్తాకు చేదు అనుభవం ఎదురైంది. సోమవారం అరుణ్ జైట్లీ స్టేడియంలో ఫుట్‌బాల్ దిగ్గజం లియోనెల్ మెస్సీకి స్వాగతం పలికేందుకు ఆమె వేదికపైకి రాగానే, ప్రేక్షకుల నుంచి ‘ఏక్యూఐ, ఏక్యూఐ’ (గాలి నాణ్యత సూచీ) అంటూ నినాదాలు వెల్లువెత్తాయి. దీనికి సంబంధించిన వీడియో సోషల్ మీడియాలో వైరల్ కావడంతో ఈ ఘటన చర్చనీయాంశంగా మారింది.

ఢిల్లీలో సోమవారం వాయు కాలుష్యం అత్యంత తీవ్రస్థాయికి చేరింది. ఉదయం గాలి నాణ్యత సూచీ (AQI) 498 పాయింట్లకు పడిపోగా, సాయంత్రానికి 427 వద్ద స్థిరపడింది. దీంతో వరుసగా మూడో రోజు కూడా నగరం ‘తీవ్ర’ కాలుష్య విభాగంలోనే కొనసాగింది. దట్టమైన పొగమంచు కారణంగా రోడ్లపై ప్రయాణాలు ప్రమాదకరంగా మారాయి.

ఈ ఘటనపై ఆమ్ ఆద్మీ పార్టీ (ఆప్) తీవ్రంగా స్పందించింది. ఆప్ ఢిల్లీ చీఫ్ సౌరభ్ భరద్వాజ్ ఈ వీడియోను ఎక్స్‌లో పోస్ట్ చేస్తూ "ఇది అంతర్జాతీయంగా సిగ్గుచేటు. ఢిల్లీ సీఎం రాగానే మెస్సీ కోసం వచ్చిన జనం ‘ఏక్యూఐ, ఏక్యూఐ’ అని నినదించారు," అని విమర్శించారు. కాలుష్యంపై కేంద్రంలోని, ఢిల్లీలోని బీజేపీ ప్రభుత్వాలు నిర్లక్ష్యంగా వ్యవహరిస్తున్నాయని, ప్రధాని మౌనంగా ఉన్నారని ఆరోపించారు.

అయితే, ఈ విమర్శలను సీఎం రేఖా గుప్తా తిప్పికొట్టారు. కాలుష్యాన్ని అరికట్టేందుకు తమ ప్రభుత్వం అన్ని ప్రయత్నాలు చేస్తోందన్నారు. ఇది 27 ఏళ్ల సమస్య అని, దాన్ని పరిష్కరించేందుకు తమకు కనీసం 27 నెలల సమయం కావాలని కోరారు. గతంలో అధికారంలో ఉన్న ఆప్, కాంగ్రెస్ ప్రభుత్వాలు ఏమీ చేయలేదని ఆమె ఆరోపించారు.

ఇదిలా ఉండగా, మెస్సీ తన పర్యటన ముగింపులో స్పానిష్ భాషలో "గ్రాసియాస్ ఢిల్లీ! హస్తా ప్రోంటో" (ధన్యవాదాలు ఢిల్లీ! త్వరలో మళ్లీ కలుద్దాం) అని చెప్పి అభిమానులను ఉత్సాహపరిచారు.