బాపట్ల జిల్లాలో ఎగసిపడుతున్న అలలు... పలు బీచ్ ల మూసివేత

దిత్వా తుపాను తీవ్ర వాయుగుండంగా బలహీనపడినప్పటికీ, తుపాను అవశేషం ప్రభావంతో ఆంధ్రప్రదేశ్ కోస్తా తీరం అల్లకల్లోలంగా మారింది. ముఖ్యంగా బాపట్ల జిల్లాలోని వాడరేవు, రామాపురం సముద్ర తీర ప్రాంతాల్లో అలలు ఉవ్వెత్తున ఎగసిపడుతున్నాయి. వాడరేవు వద్ద సముద్రం దాదాపు 4 అడుగుల మేర ముందుకు చొచ్చుకురావడంతో తీర ప్రాంత ప్రజలు ఆందోళనకు గురవుతున్నారు. అలల తీవ్రత దృష్ట్యా అధికారులు అప్రమత్తమై వాడరేవు, రామాపురం, కటారివారిపాలెం, పొట్టి సుబ్బయ్యపాలెం బీచ్‌లను పూర్తిగా మూసివేశారు. తీర ప్రాంతాలకు వెళ్లే మార్గాల్లో పోలీసులు బారికేడ్లు ఏర్పాటు చేసి, పర్యాటకులను, స్థానికులను అటువైపు వెళ్లకుండా కట్టుదిట్టమైన చర్యలు చేపట్టారు.

నైరుతి బంగాళాఖాతంలో కేంద్రీకృతమైన 'దిత్వా' తుపాను క్రమంగా బలహీనపడుతున్నప్పటికీ, దీని ప్రభావం దక్షిణ కోస్తాంధ్ర జిల్లాలపై గణనీయంగా ఉంది. ఈ తుపాను ప్రస్తుతం చెన్నైకి 50 కిలోమీటర్ల దూరంలో కేంద్రీకృతమై ఉందని, రాబోయే 12 గంటల్లో వాయుగుండంగా బలహీనపడే అవకాశం ఉందని ఐఎండీ అధికారులు తెలిపారు. అయినప్పటికీ, దీని ఫలితంగా నెల్లూరు, తిరుపతి, చిత్తూరు జిల్లాలతో పాటు దక్షిణ కోస్తాలోని పలు ప్రాంతాల్లో రాబోయే మూడు రోజుల పాటు భారీ వర్షాలు కురుస్తాయని ఆయన స్పష్టం చేశారు.

నెల్లూరు జిల్లాలో విస్తారంగా వర్షాలు

ఈ తుపాను కారణంగా నెల్లూరు జిల్లాలో సోమవారం ఎడతెరిపి లేకుండా వర్షం కురిసింది. దీంతో జిల్లాలోని జనజీవనం స్తంభించింది. నగరంలోని అయ్యప్పగుడి వద్ద ప్రధాన రహదారి నీట మునగడంతో వాహనదారులు తీవ్ర ఇబ్బందులు ఎదుర్కొన్నారు. తల్పగిరి కాలనీ, ఆర్టీసీ కాలనీ వంటి లోతట్టు ప్రాంతాలు జలమయమయ్యాయి. 

కావలిలో అత్యధికంగా 13 సెంటీమీటర్ల వర్షపాతం నమోదు కాగా, సంగం, బుచ్చిరెడ్డిపాలెం, కోవూరు, ఆత్మకూరు వంటి పలు మండలాల్లోనూ కుండపోత వర్షం కురిసింది. ఇప్పటికే సోమశిల, కండలేరు జలాశయాలు నిండుకుండలా మారడంతో అధికారులు వరద నీటిని పెన్నా నదిలోకి విడుదల చేస్తున్నారు. కలెక్టరేట్‌లో కంట్రోల్ రూమ్ ఏర్పాటు చేసి పరిస్థితిని సమీక్షిస్తున్నారు.