Mother Dairy: వినియోగదారులకు మదర్ డెయిరీ గుడ్ న్యూస్... పాలు, నెయ్యి ధరలు తగ్గింపు!

నిత్యావసరాల ధరలతో సతమతమవుతున్న సామాన్యులకు ప్రముఖ డెయిరీ సంస్థ మదర్ డెయిరీ ఊరటనిచ్చింది. కేంద్ర ప్రభుత్వం ఇటీవల జీఎస్టీ రేట్లను సవరించిన నేపథ్యంలో, ఆ ప్రయోజనాన్ని వినియోగదారులకు బదిలీ చేస్తూ కీలక నిర్ణయం తీసుకుంది. పాలు, పనీర్, నెయ్యి, బటర్, చీజ్ వంటి పాల ఉత్పత్తుల ధరలను తక్షణమే తగ్గిస్తున్నట్లు ప్రకటించింది. ఈ తగ్గింపు ప్యాకెట్ సైజును బట్టి రూ.2 నుంచి గరిష్ఠంగా రూ.30 వరకు ఉండనుంది.

ప్రధానంగా వంటల్లో ఎక్కువగా ఉపయోగించే నెయ్యి ధరల్లో గణనీయమైన కోత విధించారు. లీటర్ నెయ్యి కార్టన్ ప్యాక్ ధర రూ.675 నుంచి రూ.645కు తగ్గింది. అదేవిధంగా, లీటర్ నెయ్యి టిన్ ధరను రూ.750 నుంచి రూ.720కి తగ్గించారు. దీంతో వినియోగదారులకు ఒకేసారి రూ.30 ఆదా కానుంది. 500 గ్రాముల బటర్ ప్యాకెట్ ధర రూ.305 నుంచి రూ.285కి దిగివచ్చింది.

ఇతర ఉత్పత్తుల విషయానికొస్తే, చీజ్ ప్రియులకు కూడా మంచి లాభం చేకూరనుంది. 480 గ్రాముల చీజ్ స్లైసెస్ ప్యాకెట్ ధర రూ.405 నుంచి రూ.380కి తగ్గింది. 180 గ్రాముల చీజ్ క్యూబ్స్ ప్యాకెట్‌పై రూ.10 తగ్గి, కొత్త ధర రూ.135గా నిర్ణయించారు. అలాగే, 200 గ్రాముల సాధారణ పనీర్ ప్యాకెట్ ధర రూ.95 నుంచి రూ.92కి, 200 గ్రాముల మలాయ్ పనీర్ ప్యాకెట్ ధర రూ.100 నుంచి రూ.97కి తగ్గింది.

జీఎస్టీ రేట్ల తగ్గింపు నిర్ణయం తీసుకున్న కేంద్ర ప్రభుత్వానికి తాము అభినందనలు తెలుపుతున్నామని మదర్ డెయిరీ మేనేజింగ్ డైరెక్టర్ మనీశ్ బాండ్లిష్ అన్నారు. "ప్రభుత్వ నిర్ణయం వల్ల కలిగిన ప్రయోజనాన్ని మా వినియోగదారులకు పూర్తిగా అందించాలనే ఉద్దేశంతోనే ఈ ధరలను సవరించాం" అని ఆయన ఒక ప్రకటనలో తెలిపారు. గత సంవత్సరం రూ.17,500 కోట్ల టర్నోవర్ నమోదు చేసిన మదర్ డెయిరీ, ఈ తాజా నిర్ణయంతో మార్కెట్లో తన స్థానాన్ని మరింత పటిష్ఠం చేసుకోవడంతో పాటు, కుటుంబ బడ్జెట్‌లపై భారాన్ని తగ్గించడంలో సహాయపడనుంది.