లోన్ తీసుకున్నారా?.. ఈ మూడు బ్యాంకుల్లో వడ్డీ రేట్లు తగ్గాయి!

ఆర్బీఐ కీలకమైన రెపో రేటులో ఇటీవల ఎలాంటి మార్పులు చేయనప్పటికీ, దేశంలోని మూడు ప్రముఖ బ్యాంకులు తమ వినియోగదారులకు శుభవార్త అందించాయి. తమంతట తాముగా ముందుకు వచ్చి రుణాలపై వడ్డీ రేట్లను తగ్గిస్తున్నట్లు ప్రకటించాయి. బ్యాంక్ ఆఫ్ బరోడా, ఇండియన్ ఓవర్సీస్ బ్యాంక్, ఐడీబీఐ బ్యాంక్ ఈ నిర్ణయం తీసుకున్నాయి. ఈ బ్యాంకులు తమ మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేట్లను (ఎంసీఎల్ఆర్‌) సవరించడంతో, వాటితో అనుసంధానమైన గృహ, వాహన, వ్యక్తిగత రుణాల వడ్డీ రేట్లు తగ్గనున్నాయి.

ఈ నిర్ణయంతో ఫ్లోటింగ్ వడ్డీ రేటుపై ఇప్పటికే రుణాలు తీసుకున్న వారికి ఈఎంఐ భారం తగ్గే అవకాశం ఉంది. బ్యాంకులు తగ్గించిన వడ్డీ రేట్ల ప్రయోజనాన్ని పొందడం ద్వారా నెలవారీ వాయిదాను తగ్గించుకోవచ్చు లేదా రుణ కాలపరిమితిని కుదించుకోవచ్చు.

ఏయే బ్యాంకుల్లో ఎంత తగ్గింది?

బ్యాంక్ ఆఫ్ బరోడా: ఈ ప్రభుత్వ రంగ బ్యాంకు తన ఎంసీఎల్ఆర్ రేట్లను 15 బేసిస్ పాయింట్ల వరకు తగ్గించింది. దీనితో ఏడాది కాలపరిమితి గల ఎంసీఎల్ఆర్ 8.80 శాతానికి చేరింది. సవరించిన ఈ కొత్త వడ్డీ రేట్లు సెప్టెంబర్ 12 నుంచే అమలులోకి వచ్చినట్లు బ్యాంకు ఒక ప్రకటనలో తెలిపింది.

ఇండియన్ ఓవర్సీస్ బ్యాంక్: మరో ప్రభుత్వ రంగ బ్యాంక్ అయిన ఇండియన్ ఓవర్సీస్ బ్యాంక్, వివిధ కాలపరిమితులపై 5 బేసిస్ పాయింట్ల వరకు ఎంసీఎల్ఆర్ తగ్గించింది. అత్యధిక వినియోగదారుల రుణాలు అనుసంధానమై ఉండే ఏడాది కాలపరిమితి ఎంసీఎల్ఆర్ ఇప్పుడు 8.85 శాతంగా ఉంది. ఈ కొత్త రేట్లు సెప్టెంబర్ 15 నుంచి అమల్లోకి రానున్నాయి.

ఐడీబీఐ బ్యాంక్: ఐడీబీఐ బ్యాంక్ సైతం తన ఎంసీఎల్ఆర్ రేట్లను సవరించింది. ఈ బ్యాంకులో ఏడాది కాలపరిమితి ఎంసీఎల్ఆర్ 8.75 శాతానికి చేరింది. ఈ మార్పులు కూడా సెప్టెంబర్ 12 నుంచే అమలులోకి వచ్చాయి.

సాధారణంగా ఆర్బీఐ రెపో రేటును తగ్గించినప్పుడే బ్యాంకులు వడ్డీ రేట్లను సవరిస్తాయి. కానీ, ప్రస్తుతం అందుకు భిన్నంగా బ్యాంకులు స్వచ్ఛందంగా వడ్డీ రేట్లను తగ్గించడం రుణ గ్రహీతలకు సానుకూల పరిణామంగా విశ్లేషకులు భావిస్తున్నారు.