ఎయిరిండియా కీలక నిర్ణయం.. ఉద్యోగుల రిటైర్మెంట్ వయసు భారీగా పెంపు!

టాటా గ్రూప్ యాజమాన్యంలోని ఎయిరిండియా సంస్థ తమ ఉద్యోగులకు సంబంధించి ఒక కీలక నిర్ణయం తీసుకుంది. సంస్థలోని పైలట్లు, ఇతర సిబ్బంది పదవీ విరమణ వయసును పెంచుతున్నట్లు ప్రకటించింది. ఈ నిర్ణయంతో పైలట్ల రిటైర్మెంట్ వయసు 65 ఏళ్లకు, పైలట్లు కాని ఇతర సిబ్బంది (నాన్-ఫ్లయింగ్ స్టాఫ్) రిటైర్మెంట్ వయసు 60 ఏళ్లకు పెరగనుంది. ప్రస్తుతం ఈ రెండు విభాగాల ఉద్యోగుల పదవీ విరమణ వయసు 58 ఏళ్లుగా ఉంది.

అధికారిక వర్గాల సమాచారం ప్రకారం, ఇటీవల జరిగిన ఒక టౌన్‌హాల్ సమావేశంలో ఎయిరిండియా సీఈఓ, మేనేజింగ్ డైరెక్టర్ క్యాంప్‌బెల్ విల్సన్ ఈ విషయాన్ని స్వయంగా వెల్లడించారు. గతేడాది నవంబర్‌లో విస్తారా ఎయిర్‌లైన్స్‌ను ఎయిరిండియాలో విలీనం చేసిన సంగతి తెలిసిందే. విస్తారాలో పైలట్ల రిటైర్మెంట్ వయసు 65 ఏళ్లుగా ఉండగా, ఎయిరిండియాలో 58 ఏళ్లుగానే ఉండేది. ఈ వ్యత్యాసంపై ఎయిరిండియా పైలట్లలో కొంతకాలంగా అసంతృప్తి నెలకొంది. ఈ నేపథ్యంలో రెండు సంస్థల విధానాలను సమన్వయం చేసే ప్రక్రియలో భాగంగానే తాజా నిర్ణయం తీసుకున్నట్లు తెలుస్తోంది.

ప్రస్తుతం ఎయిరిండియాలో సుమారు 24,000 మంది ఉద్యోగులు ఉండగా, వీరిలో 3,600 మంది పైలట్లు, 9,500 మంది క్యాబిన్ సిబ్బంది ఉన్నారు. అయితే, క్యాబిన్ సిబ్బంది పదవీ విరమణ వయసును (ప్రస్తుతం 58 ఏళ్లు) పెంచారా? లేదా? అనే దానిపై ఇంకా స్పష్టత రాలేదు.

వాస్తవానికి, ఎయిరిండియాలో పైలట్ల రిటైర్మెంట్ వయసు అధికారికంగా 58 ఏళ్లుగా ఉన్నప్పటికీ, చాలా మందికి విమానయాన నియంత్రణ సంస్థ (డీజీసీఏ) నిబంధనల ప్రకారం 65 ఏళ్ల వరకు పదవీకాలాన్ని పొడిగిస్తూ వస్తున్నారు. ఇప్పుడు ఈ విధానాన్ని అధికారికంగా ఖరారు చేశారు. ఈ మార్పులపై ఎయిరిండియా యాజమాన్యం నుంచి ఇప్పటివరకు ఎలాంటి అధికారిక ప్రకటన వెలువడలేదు.