5 పరుగుల తేడాతో 7 వికెట్లు కోల్పోయిన బంగ్లాదేశ్.. శ్రీలంక ప్రపంచ రికార్డ్

క్రికెట్‌లో ఎప్పుడు ఏం జరుగుతుందో ఊహించడం కష్టం. గెలుపు ఖాయం అనుకున్న మ్యాచ్‌లు కూడా అనూహ్యంగా చేజారిపోతుంటాయి. సరిగ్గా ఇలాంటి ఘటనే శ్రీలంక, బంగ్లాదేశ్ మధ్య జరిగిన తొలి వన్డేలో చోటుచేసుకుంది. సునాయాసంగా గెలుస్తుందనుకున్న బంగ్లాదేశ్, ఒక్కసారిగా కుప్పకూలి ఘోర పరాజయం చవిచూసింది.

కొలంబోలోని ఆర్. ప్రేమదాస స్టేడియం వేదికగా జరిగిన ఈ మ్యాచ్‌లో, 245 పరుగుల లక్ష్య ఛేదనకు దిగిన బంగ్లాదేశ్ ఒక దశలో వికెట్ నష్టానికి 100 పరుగులు చేసి పటిష్ట స్థితిలో నిలిచింది. దీంతో బంగ్లా విజయం లాంఛనమే అని అందరూ భావించారు. కానీ, ఆ తర్వాత జరిగిన పరిణామం యావత్ క్రీడాభిమానులను దిగ్భ్రాంతికి గురిచేసింది.

కేవలం 27 బంతుల వ్యవధిలో, 5 పరుగులు మాత్రమే జోడించి బంగ్లాదేశ్ ఏకంగా 7 వికెట్లను కోల్పోయింది. 100/1 స్కోరుతో ఉన్న జట్టు, చూస్తుండగానే 105/7గా పతనమైంది. ఈ అనూహ్య పరిణామంతో ఓటమి అంచున నిలిచిన బంగ్లాదేశ్, ఆ తర్వాత కోలుకోలేకపోయింది. చివరికి 167 పరుగులకే ఆలౌట్ అయింది. దీంతో శ్రీలంక 77 పరుగుల భారీ తేడాతో ఘన విజయం సాధించింది. ఈ విజయంతో మూడు మ్యాచ్‌ల వన్డే సిరీస్‌లో లంక 1-0 ఆధిక్యంలోకి దూసుకెళ్లింది.

కాగా, ఈ విజయంతో శ్రీలంక ఖాతాలో పలు రికార్డులు వచ్చి చేరాయి. వన్డేల్లో ఐదు పరుగులిచ్చి ఏడు వికెట్లు పడగొట్టిన తొలి జట్టుగా అవతరించింది. ఆఫ్ఘనిస్థాన్‌తో గతేడాది నెలకొల్పిన సొంత రికార్డు ఈ దెబ్బతో తుడిచిపెట్టుకుపోయింది. ఏడు అంత కంటే తక్కువ పరుగులిచ్చి 7 వికెట్లు పడగొట్టడం శ్రీలంకకు ఇది మూడోసారి. ఈ ఘనత సాధించిన జట్లలో శ్రీలంక తర్వాత వెస్టిండీస్ మాత్రమే ఉంది.