విజయనగరం జిల్లాలో తీవ్ర విషాదం... కారులో ఊపిరాడక నలుగురు చిన్నారుల మృతి

విజయనగరం జిల్లాలో తీవ్ర విషాదకరమైన సంఘటన చోటుచేసుకుంది. కంటోన్మెంట్‌ పరిధిలోని ద్వారపూడి గ్రామంలో ఆడుకోవడానికి వెళ్లిన నలుగురు చిన్నారులు ఓ కారులో చిక్కుకుపోయి, ఊపిరాడక ప్రాణాలు కోల్పోయారు. ఈ దుర్ఘటనతో గ్రామంలో విషాద ఛాయలు అలుముకున్నాయి.

స్థానికులు అందించిన వివరాల ప్రకారం, ఆదివారం ఉదయం నలుగురు చిన్నారులు ఆడుకునేందుకు ఇళ్ల నుంచి బయటకు వెళ్లారు. అయితే, చాలాసేపటి వరకు వారు తిరిగి రాకపోవడంతో తల్లిదండ్రులు ఆందోళనకు గురయ్యారు. చుట్టుపక్కల ప్రాంతాల్లో వెతికినా పిల్లల ఆచూకీ లభించలేదు. చివరకు, గ్రామంలోని మహిళా మండలి కార్యాలయం దగ్గర నిలిపి ఉంచిన ఓ పాత కారులో పిల్లలు కదలకుండా పడి ఉండటాన్ని కొందరు గమనించారు. వెంటనే కారు దగ్గరకు వెళ్లి చూడగా, అప్పటికే నలుగురు చిన్నారులు ప్రాణాలు కోల్పోయి కనిపించారు.

సరదాగా ఆడుకునేందుకు కారులోకి వెళ్లిన చిన్నారులు, ప్రమాదవశాత్తూ డోర్లు లాక్ చేసుకోవడంతో బయటకు రాలేకపోయి ఉంటారని స్థానికులు భావిస్తున్నారు. దీంతో, కారులోపల గాలి ఆడక ఊపిరి అందక వారు మృతి చెంది ఉండవచ్చని ప్రాథమికంగా అంచనా వేస్తున్నారు. మరణించిన చిన్నారులను ఉదయ్‌ (8), చారుమతి (8), చరిష్మా (6) మరియు మనస్విగా గుర్తించారు. వీరిలో చారుమతి, చరిష్మా అక్కాచెల్లెళ్లు కావడం మరింత విషాదకరం.

ఒకేసారి నలుగురు పిల్లలు చనిపోవడంతో ద్వారపూడి గ్రామం శోకసంద్రంలో మునిగిపోయింది. తమ పిల్లల మృతదేహాలను చూసి తల్లిదండ్రులు, బంధువులు గుండెలవిసేలా రోదించడం అక్కడున్న ప్రతి ఒక్కరినీ కంటతడి పెట్టించింది. ఈ ఘటన స్థానికంగా తీవ్ర కలకలం రేపింది.