శృంగార తార: శృంగార తారపై చేయి చేసుకున్న ఆసీస్ మాజీ క్రికెటర్!
- లండన్ నైట్ క్లబ్ లో తప్పతాగిన షేన్ వార్న్
- శృంగార తార వేలెరీ ఫాక్స్ పై దురుసు ప్రవర్తన
- ఆమె ముఖంపై కొట్టిన వైనం
- వాపోయిన బాధితురాలు
ఆస్ట్రేలియా మాజీ క్రికెటర్, స్పిన్ దిగ్గజం షేన్ వార్న్ ఫుల్ గా మద్యం సేవించి ఓ శృంగార తారపై చేయి చేసుకున్న సంఘటన లండన్ నైట్ క్లబ్ లో జరిగింది. శృంగార తార వేలెరీ ఫాక్స్ ముఖంపై షేన్ వార్న్ కొట్టడంతో ఆమె కన్ను వాచిపోయింది. ఈ ఫొటోను తన ట్విట్టర్ ఖాతాలో పోస్ట్ చేసిన ఫాక్స్, షేన్ వార్న్ పై మండిపడుతూ వ్యాఖ్యలు చేసింది.
‘ఓ మహిళపై చేయి చేసుకుని గర్వంగా ఫీలవుతున్నావా? నువ్వు ఎంత పేరుపొందిన వ్యక్తివి అయితే మాత్రం ఓ మహిళను కొట్టి తప్పించుకుందామని అనుకుంటున్నావా?..’ అంటూ ఆమె మండిపడింది. కాగా, ఈ సంఘటనపై ప్రత్యక్షసాక్షులు స్పందిస్తూ, ఫాక్స్ ను షేన్ వార్న్ కొట్టగానే ఆమె కిందపడిపోయిందని చెప్పారు. ఈ సంఘటనకు సంబంధించిన సీసీ టీవీ ఫుటేజ్ లను పోలీసులు పరిశీలించి చర్యలు చేపట్టనున్నట్టు సమాచారం.
వెస్ట్ మినిస్టర్ లోని హెర్ట్ ఫోర్డ్ స్ట్రీట్ లో ఉన్న ఓ నైట్ క్లబ్ లో శుక్రవారం రాత్రి ఈ సంఘటన జరిగినట్టు స్కాట్లాండ్ యార్డు పోలీసులు తెలిపారు. ఇదిలా ఉండగా, గతంలో కూడా షేన్ వార్న్ తన అసభ్య ప్రవర్తన కారణంగా ఓ బ్రిటిష్ నర్సు ను ఇబ్బందిపెట్టాడు. ఆమెకు అసభ్య మెస్సేజ్ లు పంపించాడు. ఈ సంఘటన నేపథ్యంలో నాడు ఆసీస్ జట్టుకు వైస్ కెప్టెన్ గా ఉన్న షేన్ వార్న్ తన పదవిని కోల్పోయాడు. షేన్ వార్న్ కు అక్రమసంబంధాలు ఉన్నాయనే ఆరోపణల నేపథ్యంలో ఆయన భార్య సిమోన్ కూడా ఆయనకు దూరంగా ఉంటోంది.
