Rashi: సినిమా కబుర్లు.. సంక్షిప్త సమాచారం!

*  'జై లవ కుశ' సినిమాలో ఓ పాట పాడాలని ఉన్నప్పటికీ పాడలేకపోయానని చెబుతోంది కథానాయిక రాశిఖన్నా. "దర్శకుడు బాబీ కూడా ఈ విషయంలో నన్ను ప్రోత్సహించారు. అయితే, టైం సమస్య వచ్చింది. తమిళంలోనూ, మలయాళంలోను కొన్ని సినిమాలు చేస్తున్నాను. వాటితో బిజీ కావడం వల్ల పాడలేకపోయాను" అని చెప్పింది రాశి.      
*  తమిళ స్టార్ విజయ్ హీరోగా నటిస్తున్న 61వ చిత్రాన్ని 'అదిరింది' పేరిట తెలుగులోకి డబ్ చేస్తున్నారు. అట్లీకుమార్ దర్శకత్వం వహిస్తున్న ఈ చిత్రం షూటింగ్ మొత్తం పూర్తయింది. దీనిని దీపావళికి విడుదల చేయడానికి ప్లాన్ చేస్తున్నారు. ఇందులో కాజల్, సమంతా, నిత్యా మీనన్ కథానాయికలుగా నటించారు.
*  నాని హీరోగా మేర్లపాక గాంధీ దర్శకత్వంలో రూపొందుతున్న 'కృష్ణార్జున యుద్ధం' చిత్రం షూటింగ్ ప్రస్తుతం చెక్ రిపబ్లిక్ రాజధాని ప్రేగ్ సిటీలో జరుగుతోంది. ఇరవై రోజుల పాటు అక్కడ షూటింగ్ నిర్వహిస్తారు.          
*  మణిరత్నం చేసే తదుపరి చిత్రంకు సంబంధించిన అధికారిక ప్రకటన వెలువడింది. ఆయన తాజా చిత్రం షూటింగ్ జనవరి నుంచి మొదలవుతుంది. అరవింద్ స్వామి, విజయ్ సేతుపతి, శింబు, ఫహాద్ ఫాజిల్, ఐశ్వర్య రాజేష్, జ్యోతిక తదితరులు ఇందులో ముఖ్య పాత్రలు పోషిస్తారు.