: ఉత్తర కొరియా క్షిపణి పరీక్షపై మండిపడిన అమెరికా.. మిత్రదేశాలకు ఏం జరిగినా చూస్తూ ఊరుకోబోమని హెచ్చరిక

ఉత్తర కొరియా బాలిస్టిక్ క్షిపణి పరీక్షను అమెరికా మిలటరీ ధ్రువీకరించింది. బుధవారం ఉదయం 4.59 (స్థానిక కాలమానం ప్రకారం)కు జలాంతర్గామి ద్వారా కేఎన్-11 క్షిపణికి ఉత్తర కొరియా పరీక్షలు నిర్వహించింది. జపాన్‌ సముద్రంలో కొరియాకు 480 కిలోమీటర్ల దూరంలో ఈ క్షిపణి సముద్రంలో కూలినట్టు అమెరికా ఆర్మీ పేర్కొంది. ఉత్తర కొరియా చర్యలపై అమెరికా భగ్గుమంది. ఈ విషయాన్ని ఐక్యరాజ్య సమితిలో లేవనెత్తుతామని పేర్కొంది. ఈ చర్యలు ఉత్తర అమెరికాను ఏమాత్రం భయపెట్టలేవని నార్త్ అమెరికా ఏరోస్పేస్ డిఫెన్స్ కమాండ్ పేర్కొంది. దక్షిణ కొరియా, జపాన్ తదితర తమ మిత్రదేశాలకు ఏం జరిగినా చూస్తూ ఊరుకోబోమని పెంటగాన్ అధికార ప్రతినిధి కమాండర్ గ్యారీ రోస్ హెచ్చరించారు. ఏ దాడి నుంచైనా తమను, తమ మిత్రదేశాలను రక్షించుకుంటామని ఆయన పేర్కొన్నారు. ఉద్రికత్తలను పెంచే అన్ని చర్యలను కట్టిపెట్టాల్సిందిగా నార్త్ కొరియాను కోరినట్టు చెప్పారు. కాగా కొరియా బాలిస్టిక్ క్షిపణి కార్యక్రమాలను నిలిపేయాల్సిందిగా ఐరాస భద్రతా మండలి తీర్మానాలు చేసిన విషయం తెలిసిందే.