: అంబులెన్స్‌ను చోరీ చేసి, అందులో వెళ్లిపోయిన మహిళ
రాత్రిపూట ఇంటికి వెళ్లేందుకు ఆఖరి బస్సు కూడా మిస్ అయిపోతే ఏం చేస్తాం? ఏ ట్యాక్సీ కోస‌మో, వాహ‌న‌దారులు ఇచ్చే లిఫ్ట్ కోస‌మో ప్ర‌య‌త్నాలు చేస్తాం. అదీ కుద‌ర‌క‌పోతే చివ‌రికి న‌డుచుకుంటూ అయినా వెళ్లిపోతాం. అయితే అమెరికాలో మాత్రం ఓ మహిళ అలా చేయ‌లేదు. రాత్రి పూట బస్సు కోసం బ‌స్టాండ్‌కి వ‌చ్చిన లిసా కార్(43) చివ‌రి బస్సు కూడా వెళ్లిపోయింద‌ని తెలుసుకొని, ఖాళీగా క‌నిపించిన అంబులెన్సులో డ్రైవర్ సీటులో కూర్చొని ఎంచక్కా అందులో వెళ్లిపోయింది. లిసా కార్ ఒహియ రాష్ట్రంలోని స్ప్రింగ్ ఫీల్డ్ టౌన్ షిప్ కి చెందిన మహిళ. అంబులెన్స్ ను ఆస్పత్రి ముందు నిలిపి డ్రైవర్ రోగితో పాటు వెళ్లిన‌ప్పుడు అంబులెన్స్ ఖాళీ ఉంది. దీంతో లిసా అందులో వెళ్లిపోయింది. డ్రైవర్ మ‌ళ్లీ తిరిగి వ‌చ్చి చూస్తే ఆ అంబులెన్స్ క‌నిపించ‌లేదు. దీనిపై కేసు న‌మోదు చేసుకున్న పోలీసులు ఆమెపై దొంగతనం ఆరోపణ కేసు న‌మోదు చేశారు. దీంతో లిసా డ్రైవింగ్ లైసెన్స్ రద్దు అయ్యే అవ‌కాశం ఉంది. రాత్రిపూట ఇంటికి వెళ్లేందుకు ఆఖరి బస్సు కూడా వెళ్లిపోవడంతో ఈ ప‌నిచేసిన‌ట్లు నిందితురాలు ఒప్పుకుంది.
