: నల్ల ధనం మూటల విషయంలో భారత్ ను వెనక్కు నెట్టేసిన పాక్!
అక్రమంగా కూడబెట్టిన ధనాన్ని భద్రంగా దాచుకునేందుకు స్విస్ బ్యాంకులు స్వర్గధామంగా మారాయి. వేలాది మంది భారతీయులు లక్షలాది కోట్ల రూపాయలను ఈ బ్యాంకుల్లో దాచుకున్నారని గడచిన ఎన్నికల్లో బీజేపీ ప్రధానంగా ప్రచారం చేసింది. తమ చేతికి అధికారం చిక్కితే సదరు సొమ్మును నెల రోజుల్లో వెనక్కు తీసుకొస్తామని చెప్పింది. నెల రోజుల్లో కాదు కదా.. రెండేళ్లు గడిచినా బీజేపీ సర్కారు ఆ సొమ్మును తేలేకపోయింది. అయితే అక్కడి నల్ల ధనం మూటలను తగ్గించడంలో మాత్రం మోదీ సర్కారు సఫలీకృతమైంది. అంతేకాదండోయ్... ఇకపై అక్కడ డబ్బు దాచుకునేందుకు భారతీయులు సాహసించడం లేదు. వెరసి స్విస్ బ్యాంకుల్లోని భారతీయుల నల్ల ధనం మూటలు క్రమంగా తగ్గిపోతున్నాయి. ప్రస్తుతం ఆ బ్యాంకుల్లో భారతీయులకు చెందిన సొమ్ము కేవలం రూ.8 వేల కోట్ల లోపేనని సమాచారం. ఇక అన్ని అంశాల్లో భారత్ తో పోటీకి దిగుతున్న పాకిస్థాన్... నల్ల ధనం విషయంలోనూ అదే వైఖరిని కొనసాగిస్తోంది. ఓ వైపు స్విస్ బ్యాంకుల్లో భారతీయుల అక్రమ సొమ్ము తగ్గిపోతుంటే... పాక్ జాతీయులకు చెందిన నల్ల ధనం మూటల సంఖ్య క్రమంగా పెరిగిపోతోందట. 2014తో పోలిస్తే స్విస్ బ్యాంకుల్లో పాక్ నల్ల ధనం గతేడాది 16 శాతం మేర పెరిగింది.
