: రాహుల్ గాంధీ సహా అఖిలేశ్, మాయావతి, ఒవైసీలు గాడిదలట!: యూపీలో బీజేపీ పోస్టర్ కలకలం
ఉత్తరప్రదేశ్ లోని గోరఖ్ పూర్ లో వెలసిన బీజేపీ పోస్టర్ ఒకటి పెను కలకలం రేపుతోంది. గోరఖ్ పూర్ లో బీజేపీ మైనారిటీ సెల్ వేసిన ఈ పోస్టర్ లో... కాంగ్రెస్ పార్టీ ఉపాధ్యక్షుడు రాహుల్ గాంధీ సహా యూపీ మాజీ సీఎం మాయావతి, ప్రస్తుత సీఎం అఖిలేశ్ యాదవ్ లను గాడిదలుగా పేర్కొన్నారు. ఇక హైదరాబాదు ఎంపీ, మజ్లిస్ అధినేత అసదుద్దీన్ ఒవైసీని కూడా ఆ పోస్టర్ లో వదలలేదు. ఒవైసీని కూడా గాడిదగా అభిర్ణించిన మైనారిటీ నేతలు... బీజేపీ ఎంపీ యోగి ఆదిత్యనాథ్ ను మాత్రం పులిగా అభివర్ణించారు. ఓ వైపు యోగిని పులిగా అభివర్ణిస్తూనే... పులి బొమ్మ వెనుక ఆయన ఫొటోను ముద్రించారు. మరోవైపు రాహుల్, మాయావతి, అఖిలేశ్, ఒవైసీలను గాడిదలుగ చూపిస్తూ వారి ఫొటోలకు గాడిదల బొమ్మలను అతికించారు. ఈ పోస్టర్ అక్కడ దుమారం రేపుతోంది. గతంలో రాహుల్ గాంధీని సింహంగా అభివర్ణిస్తూ కాంగ్రెస్ పార్టీ వేసిన పోస్టర్ కు ప్రతిగానే ఈ పోస్టర్ ను వేసినట్లు తెలుస్తోంది.
