: ‘గులాబీ గూటికి పొంగులేటి’పై రేవంత్ రెడ్డి సంచలన వ్యాఖ్యలు!
వైసీపీ తెలంగాణ అధ్యక్షుడు, ఖమ్మం ఎంపీ పొంగులేటి శ్రీనివాసరెడ్డి టీఆర్ఎస్ లోకి చేరిపోవడం ఖాయమైపోయింది. ఈ నెల 4న టీఆర్ఎస్ లో చేరుతున్నానని స్వయంగా పొంగులేటి కొద్దిసేపటి క్రితం ప్రకటించారు. టీఆర్ఎస్ లోకి పొంగులేటి చేరిక, టీఆర్ఎస్ లో వైసీపీ తెలంగాణ శాఖ విలీనంపై టీడీపీ ఫైర్ బ్రాండ్, టీ టీడీఎల్పీ నేత రేవంత్ రెడ్డి కొద్దిసేపటి క్రితం సంచలన వ్యాఖ్యలు చేశారు. హైదరాబాదులో మీడియాతో మాట్లాడిన రేవంత్ రెడ్డి టీఆర్ఎస్ లో పొంగులేటి చేరికకు కారణాలను వివరించారు. రూ.1,500 కోట్ల విలువైన పనులను టీఆర్ఎస్ అధినేత కేసీఆర్... పొంగులేటికి ఆఫర్ చేశారని రేవంత్ ఆరోపించారు. ఇంతమేర డబ్బు ఎర వేస్తే పొంగులేటి... మొత్తం పార్టీనే టీఆర్ఎస్ లో విలీనం చేయక ఏం చేస్తారని ఆయన వ్యాఖ్యానించారు. ఏపీలో తన పార్టీ ఎమ్మెల్యేలను టీడీపీ కొనుగోలు చేస్తోందని ఊరూరా తిరిగి ఆరోపణలు గుప్పిస్తున్న వైసీపీ అధినేత వైఎస్ జగన్ మోహన్ రెడ్డి... తెలంగాణలో తన పార్టీ నేతల ఫిరాయింపులపై ఎందుకు మాట్లాడటం లేదని రేవంత్ రెడ్డి ప్రశ్నించారు.
