: చైనా-పాకిస్థాన్ సంయుక్త సైనిక విన్యాసాలు...భారత్ ను భయపెట్టేందుకేనా?
చైనా-పాకిస్థాన్ దేశాలు సంయుక్త సైనిక విన్యాసాలు చేపట్టాయి. షహీన్ (ఈగిల్)-5 పేరిట నిర్వహిస్తున్న సైనిక విన్యాసాలను ఏప్రిల్ 9 నుంచి 30 వరకు ఈ రెండు దేశాలు నిర్వహిస్తున్నట్టు ప్రకటించాయి. ఈ సంయుక్త సైనిక విన్యాసాలు ఇరు దేశాల మధ్య సైనిక సంబంధాలు పెంపొందించుకునేందుకు దోహద పడతాయని చైనాకు చెందిన సైనికాధికారి షీన్ అభిప్రాయపడ్డారు. భవిష్యత్ లో ఒకే లక్ష్యంపై పని చేసేవారితో కలిసిపని చేసేందుకు, సహకరించేందుకు చైనా వాయుసేన సిద్ధంగా ఉందని షీన్ తెలిపారు. కాగా, గతంలో పాకిస్థాన్...అమెరికా, చైనా, ఫ్రాన్స్ దేశాలు విక్రయించే యుద్ధ విమానాలపై ఆధారపడి ఉండేది. ఇటీవల చైనా సహకారంతో సొంతంగా జేఎఫ్-17 అనే యుద్ధ విమానాన్ని తయారు చేసుకుంది. భారత్ పొరుగు దేశాలైన ఈ రెండు దేశాలు భారత్ ను అన్ని రకాలుగా ఇబ్బంది పెట్టే ప్రయత్నం చేస్తున్నాయి. తాజాగా నిర్వహిస్తున్న సంయుక్త సైనిక విన్యాసాలు కూడా భారత్ ను దృష్టిలో పెట్టుకుని ఆ రెండు దేశాలు చేస్తున్నాయా? అనే అనుమానం కలుగుతోంది.
