: ఏపీలో భారీగా ఐపీఎస్ ల బదిలీలకు రంగం సిద్ధం!... చంద్రబాబుతో డీజీపీ, బెజవాడ కమిషనర్ భేటీ
ఏపీ పోలీసు శాఖలో భారీ ఎత్తున బదిలీలకు రంగం సిద్ధమైనట్లు ప్రచారం జరుగుతోంది. కింది స్థాయి నుంచి పై స్థాయి వరకు అన్ని హోదాల్లో ఉన్న పోలీసులను బదిలీ చేయాలని ప్రభుత్వం భావిస్తున్నట్లు సమాచారం. ఈ మేరకు నేటి ఉదయం కేబినెట్ సమావేశానికి ముందు ఏపీ సీఎం నారా చంద్రబాబునాయుడితో డీజీపీ జేవీ రాముడు, విజయవాడ నగర పోలీస్ కమిషనర్ గౌతం సవాంగ్ ప్రత్యేకంగా భేటీ అయ్యారు. ఈ సందర్భంగా ఐపీఎస్ అధికారుల బదిలీల గురించి చంద్రబాబు వారితో చర్చించినట్లు తెలుస్తోంది. రాష్ట్రంలో శాంతి భద్రతల పరిరక్షణలో కీలకంగా వ్యవహరిస్తున్న ఐపీఎస్ అధికారులను ఒకేసారి భారీ సంఖ్యలో బదిలీ చేస్తే వచ్చే ఇబ్బందులపై ఆయన వారితో చర్చించినట్లు సమాచారం. ఇప్పటికే ఐపీఎస్ అధికారుల బదిలీలకు సంబంధించిన జాబితా ఖరారైందని... ఒకటి, రెండు రోజుల్లో అధికారికంగా ఉత్తర్వులు వెలువడనున్నాయని విశ్వసనీయ సమాచారం.
