: కిల్లర్ 'వీరప్పన్' భార్యపై కేసు నమోదు
గతంలో తమిళనాడు, కర్ణాటక రాష్ట్రాలను గడగడలాడించిన స్మగ్లర్ వీరప్పన్ భార్య ముత్తులక్ష్మిపై పోలీసులు కేసు నమోదు చేశారు. ఈ రెండు రాష్ట్రాల్లో వేలాది ఏనుగులను హతమార్చి వాటి దంతాలను, చందనం దుంగలను వీరప్పన్ స్మగ్లింగ్ చేశాడు. ఆ తర్వాత 2004లో ఎస్టీఎఫ్ బలగాల చేతిలో వీరప్పన్ హతమయ్యాడు. వీరప్పన్ మృతదేహాన్ని సేలం జిల్లాలోని కలత్తూరు సమీపంలోని మూలకాడులో ఖననం చేశారు. ఈ క్రమంలో గత ఆదివారం నాడు వీరప్పన్ 11వ సంస్మరణ దినం సందర్భంగా... మూలక్కాడు, మేచ్చేరిలో అనేక చోట్ల వీరప్పన్ పోస్టర్లు, బ్యానర్లను ఏర్పాటు చేశారు. అనుమతి లేకుండానే బ్యానర్లు ఏర్పాటు చేశారనే ఆరోపణలతో ముత్తులక్ష్మిపై పోలీసులు కేసు నమోదు చేశారు.
