: మాటలు కట్టిపెట్టి నాణ్యమైన క్రికెట్ పై దృష్టి పెట్టండి: టీమిండియాకు గవాస్కర్ హితవు
గాలే టెస్టులో టీమిండియా అనూహ్యరీతిలో ఓటమిపాలవడం పట్ల మాజీ కెప్టెన్ సునీల్ గవాస్కర్ ఘాటుగా స్పందించారు. తొలి టెస్టు ఓటమి దారుణం అని పేర్కొన్నారు. జట్టు మేనేజ్ మెంట్ ఇకనైనా దుందుడుకు మాటలు కట్టిపెట్టి నాణ్యమైన క్రికెట్ పై దృష్టిపెట్టాలని హితవు పలికారు. ఆటగాళ్లు ఎవరికో, ఏదో నిరూపించుకోవాల్సిన అవసరం లేదన్నారు. ఆడేది రక్షణాత్మక క్రికెట్టా, లేక, దూకుడైన క్రికెట్టా? అన్నది అనవసరం అని... మెరుగైన క్రికెట్ ఆడడం ముఖ్యమని పేర్కొన్నారు. ఎలా ఆడినా, చివరికొచ్చేసరికి గెలుపునే కోరుకుంటారని అన్నారు. ఇక, గాలే టెస్టు ఓటమి నుంచి పుంజుకునే శక్తి టీమిండియాకు ఉందని ఈ బ్యాటింగ్ లెజెండ్ అభిప్రాయపడ్డారు. జట్టులో ఆత్మస్థైర్యం పెంపొందించాల్సిన బాధ్యత కెప్టెన్ కోహ్లీ, టీమ్ డైరక్టర్ రవిశాస్త్రిలపైనే ఉందని స్పష్టం చేశారు.
