: బెంగళూరు రాయల్ చాలెంజర్స్ జట్టును అమ్మకానికి పెట్టిన లిక్కర్ కింగ్!
ఇండియన్ లిక్కర్ కింగ్ గా, కింగ్ ఫిషర్ ఎయిర్ లైన్స్ అధినేతగా ఓ వెలుగు వెలిగి ఆపై అప్పుల్లో కూరుకుపోయి ఒక్కో సంస్థ నుంచి తప్పుకుంటూ వస్తున్న విజయ్ మాల్యా, తాజాగా ఐపీఎల్ ఫ్రాంచైజీ రాయల్ చాలెంజర్స్ బెంగళూరు జట్టును అమ్మకానికి పెట్టినట్టు సమాచారం. జిందాల్ గ్రూపునకు చెందిన జేఎస్ డబ్ల్యూ స్టీల్ దీన్ని కొనుగోలు చేయనున్నట్టు తెలుస్తోంది. తాము ఒక ఐపీఎల్ టీమును కొంటున్నామని జేఎస్ డబ్ల్యూ స్టీల్ చైర్మన్ సజ్జన్ జిందాల్ వెల్లడించారు. ఇండియాలో నంబర్ వన్ క్రీడగా ఉన్న క్రికెట్ కు సంబంధించి ఒక ఐపీఎల్ జట్టును కొనుగోలు చేయాలని నిర్ణయించుకున్నామని, తమకు డబ్బులు సమస్య కాదని అన్నారు. ఓ గుర్తింపు ఉన్న జట్టును కొని క్రీడలను ప్రోత్సహించాలన్నది తమ ఆలోచనగా ఆయన వివరించారు. కాగా, విజయ్ మాల్యా 2008లో ఐపీఎల్ పోటీలను ప్రకటించి, ఫ్రాంచైజీలను విక్రయానికి ఉంచినప్పుడు బెంగళూరు జట్టును కొనుగోలు చేసిన సంగతి తెలిసిందే. ఇప్పటివరకూ 8 సార్లు ఐపీఎల్ పోటీలు జరుగగా, బెంగళూరు జట్టు ఒక్కసారి కూడా చాంపియన్ గా నిలవలేదు.
