: పైన షేర్వాణీ... లోపల పరేషానీ: హైదరాబాదుపై తెలంగాణ సీఎం కేసీఆర్ వ్యాఖ్య

---

భాగ్యనగరి హైదరాబాదుపై తెలంగాణ సీఎం కేసీఆర్ ఆసక్తికర వ్యాఖ్య చేశారు. నిన్న నగరంలోని నాగోల్ లో పర్యటించిన సందర్భంగా ఆయన చేసిన వ్యాఖ్యలు హైదరాబాదు దుస్థితిని కళ్లకు కట్టేలా ఉన్నాయి. ‘‘హైదరాబాదును చూస్తే పైన షేర్వాణీ... లోపల పరేషానీలా అన్నట్లుగా ఉంది. ఏ బస్తీలోకి తొంగిచూసినా మురికి కూపాలు, చెత్త డంపులే దర్శనమిస్తున్నాయి. ఇంటిని ఎంత శుభ్రంగా ఉంచుకుంటామో, మన వీధులను కూడా అంతే శుభ్రంగా ఉంచుకోవాలి. ఇందుకోసం గ్రేటర్ హైదరాబాదును 330 విభాగాలుగా విభజిస్తాం. బస్తీలను అధికారులకు అప్పగిస్తాం. నేనూ ఓ బస్తీని దత్తత తీసుకుంటా. బస్తీ సమస్యలపై కలిసికట్టుగా పోరాడదాం. ప్రతి బస్తీని కూకట్ పల్లి సమీపంలోని ప్రగతి నగర్ లా తీర్చిదిద్దుకుందాం’’ అని ఆయన వ్యాఖ్యానించారు.