: టీవీ సిగ్నళ్లతో వై-ఫై!
ప్రపంచవ్యాప్తంగా ఇంటర్ నెట్ సేవలు విస్తృతమవుతున్నాయి. ప్రపంచంలోని ప్రతి గ్రామంలోనూ ఇంటర్నెట్ వినియోగం పెరిగిపోతోంది. స్మార్ట్ ఫోన్లలోనూ నెట్ వినియోగిస్తున్నారు. దీంతో ఇంటర్ నెట్ సులభంగా ప్రతిఇంటికీ చేరేలా చేసేందుకు పరిశోధనలు జరుగుతున్నాయి. పరిశోధనలు ఫలిస్తే భవిష్యత్ లో ఇంటర్ నెట్ మరింత సులభంగా ప్రతి ఒక్కరికీ అందుబాటులోకి రానుంది. ప్రతి ఇంటికీ చేరే టీవీ సిగ్నళ్ల ఫ్రీక్వెన్సీ ద్వారా వై-ఫై నెట్ వర్క్ ను అందించేందుకు పరిశోధనలు జరుగుతున్నాయి. జర్మన్ శాస్త్రవేత్తలు టీవీ సిగ్నళ్లతో ఇంటర్నెట్ సేవలు అందించే దిశగా పరిశోధనలు జరుపుతున్నారు. ఈ సిగ్నళ్ల ద్వారా ఉచితంగా ఇంటర్నెట్ సేవలు అందుబాటులోకి వస్తాయని శాస్త్రవేత్తలు ఆశాభావం వ్యక్తం చేశారు. తక్కువ స్థాయిలో ఉండే టీవీ ఫ్రీక్వెన్సీ సిగ్నళ్లు గోడల్లాంటి అడ్డంకులను కూడా అధిగమించి దూసుకుపోతాయని, దీంతో స్మార్ట్ ఫోన్లకు కూడా ఇంటర్నెట్ సేవలు అందుబాటులోకి వస్తాయని శాస్త్రవేత్తలు చెబుతున్నారు. ఈ పరిశోధనలు ఫలిస్తే ఇంటర్నెట్ వినియోగించేవారి ఇంటి నుంచి కొన్ని కిలోమీటర్ల దూరంలో ఉన్న వాళ్లకు కూడా వైర్ లెస్ ల్యాన్ అందే వెసులుబాటు ఉంటుందని శాస్త్రవేత్తలు అంచనా వేస్తున్నారు. ఇలాంటి సేవలు అందుబాటులోకి వస్తే అందరికీ నెట్ సౌలభ్యం అందుతుందని వారు వివరించారు.
