: ద్రావిడ్ అసలు సిసలు గురువు!: కేపీ
స్టార్ బ్యాట్స్ మన్ కెవిన్ పీటర్సన్ తన జీవితచరిత్ర 'కేపీ'లో పలు ఆసక్తికర విషయాలు పొందుపరిచాడు. 'కేపీ' ఈ వారమే విడుదలైంది. ఆ పుస్తకంలో పలు వివాదాస్పద అంశాలను స్పృశించిన ఈ దక్షిణాఫ్రికా జాతీయుడు బ్యాటింగ్ దిగ్గజం రాహుల్ ద్రావిడ్ ను వేనోళ్ళ కొనియాడాడు. ద్రావిడ్ అసలు సిసలు గురువు అని, తనకెంతో సాయపడ్డాడని తెలిపాడు. స్పిన్ ను ఎదుర్కొనే విషయంలో టెక్నిక్ ను మెరుగుపర్చుకోవడంపై ద్రావిడ్ అమూల్యమైన సలహాలు ఇచ్చాడని పేర్కొన్నాడు. స్పిన్ ను ఎదుర్కొనడంలో ద్రావిడ్ మేటి అని కితాబిచ్చిన కేపీ, అతనిచ్చిన సూచనల ఫలితంగానే ఆటను మరింత మెరుగ్గా అర్థం చేసుకోగలిగానని చెప్పుకొచ్చాడు. తాము ఈ-మెయిళ్ళ ద్వారా సంభాషించుకునేవారమని తెలిపిన కేపీ, ఈ మేరకు ద్రావిడ్ మెయిల్ ను కూడా తన పుస్తకంలో పొందుపరిచాడు. "కేపీ, నువ్వు నిజంగా మంచి ఆటగాడివి. బంతిని సునిశితంగా పరిశీలించాలి, అదే సమయంలో నీపై నువ్వు నమ్మకం కలిగి ఉండాలి. స్పిన్ ఆడలేవని నిన్ను వేలెత్తి చూపే అవకాశం ఎవరికీ ఇవ్వొద్దు. నువ్వు స్పిన్ ను సమర్థంగా ఆడగలవు" అని ఆ మెయిల్ లో ద్రావిడ్ పేర్కొన్నాడట.
